ఆ పుకార్లకి తెరదించిన సురేందర్ రెడ్డి
- IndiaGlitz, [Tuesday,February 20 2018]
మెగాస్టార్ చిరంజీవి క‌థానాయ‌కుడిగా మెగా పవర్ స్టార్ రామ్ చరణ్ నిర్మిస్తున్న చిత్రం సైరా నరసింహారెడ్డి'. దర్శకుడు సురేందర్ రెడ్డి ఈ చారిత్రాత్మ‌క చిత్రాన్ని తెరకెక్కిస్తున్న విషయం విదితమే. బాలీవుడ్ మెగాస్టార్ అమితాబ్ బచ్చన్‌తో పాటు త‌మిళ న‌టుడు విజయ్ సేతుపతి, క‌న్న‌డ న‌టుడు కిచ్చా సుదీప్, తెలుగు న‌టుడు జ‌గ‌ప‌తిబాబు ఈ సినిమాలో కీల‌క పాత్ర‌లు పోషిస్తున్నారు. కోలీవుడ్ లేడీ సూప‌ర్ స్టార్ ఇందులో నయనతార కథానాయికగా న‌టిస్తోంది.
ఇదిలా ఉంటే.. ఆ మధ్య ఈ ప్రతిష్టాత్మక వెంచర్ నుంచి డబుల్ ఆస్కార్ అవార్డు గ్రహీత ఎ.ఆర్.రెహమాన్ తప్పుకున్న సంగతి తెలిసిందే. తాజాగా ఈ చిత్రం నుంచి బాలీవుడ్ మెగాస్టార్ అమితాబ్ కూడా తప్పుకున్నారని మీడియాలో కొన్ని కథనాలు వినిపించాయి. అయితే ఈ పుకార్లకి తెరదించుతూ.. తాజాగా అమితాబ్‌ను క‌లిసిన సంద‌ర్భంగా త‌ను దిగిన ఫొటోను సోష‌ల్ మీడియాలో షేర్ చేశారు దర్శకుడు సురేందర్ రెడ్డి. దీంతో అమితాబ్ సైరా' లో నటిస్తున్నారనే విష‌యాన్ని చెప్పకనే చెప్పారు ఈ డైరెక్టర్. ఇందులో నరసింహారెడ్డి పాత్రకి గురువు పాత్రలో అమితాబ్ నటించనున్నట్టు సమాచారం. ఇటీవలే మొదటి షెడ్యూల్ పూర్తి చేసుకున్న ఈ చిత్రం ఈ నెల 23 నుంచి రెండో షెడ్యూల్ జ‌రుపుకోనుంది. వ‌చ్చే ఏడాది ఈ సినిమా ప్రేక్ష‌కుల ముందుకు రానుంది.