கடந்த ஆண்டு ஜனவரி மாதம் சென்னை மெரீனாவில் ஜல்லிக்கட்டுக்கு ஆதரவாக நடைபெற்ற போராட்டம், ஒருசில மாணவர்கள் மற்றும் இளைஞர்களால் சிறிய அளவில் ஆரம்பமானது. ஆனால் ஒருசில நாட்களில் இந்த போராட்டம் உலகையே திரும்பி பார்க்கும் வகையில் லட்சக்கணக்கானோர் கூடியதால் பெரும் பரபரப்பு ஏற்பட்டது. எந்த அரசியல் கட்சியின் துணையில்லாமல் நடந்த இந்த போராட்டத்தின் எழுச்சி காரணமாக அப்போதைய முதல்வர் ஓ.பன்னீர்செல்வம் டெல்லி சென்று ஜல்லிக்கட்டு நடத்த சிறப்பு சட்டம் இயற்ற மத்திய அரசிடம் வலியுறுத்தி அதில் வெற்றியும் பெற்றார்.

ஆனால் அதன்பின்னர் மீண்டும் இதுபோன்ற போராட்டம் மெரீனாவில் நடந்துவிடக்கூடாது என்று காவல்துறையினர் தடை விதித்தனர். விவசாயிகள் பிரச்சனை உள்பட பல பிரச்சனைகளுக்கு மீண்டும் மெரீனாவில் போராட்டம் நடைபெற நடந்த முயற்சியினை காவல்துறையினர் தடுத்து நிறுத்தினர்

இந்த நிலையில் சென்னை மெரீனாவில் போராட்டம் நடத்த அனுமதிக்க வேண்டும் என்று தென்னிந்திய விவசாயிகள் நல சங்க தலைவர் அய்யாக்கண்ணு உச்சநீதிமன்றத்தில் வழக்கு தொடர்ந்தார். இந்த வழக்கை விசாரணை செய்த உச்சநீதிமன்றம் சென்னை மெரினா கடற்கரையில் போராட யாருக்கும் அனுமதி அளிக்க முடியாது என்று சற்றுமுன் உத்தரவு பிறப்பித்துள்ளது.