சூப்பர் ஸ்டார் ரஜினியிடம் ஆசி பெற்ற இளம் நகைச்சுவை நடிகை
- IndiaGlitz, [Tuesday,February 20 2018]
சூப்பர் ஸ்டார் ரஜினிகாந்த் விரைவில் அரசியல் கட்சி தொடங்கவுள்ள நிலையில் பிசியாக இருந்தாலும், அவரை தேடி வரும் திரையுலக பிரபலங்களை சந்திக்க அவர் மறுப்பு தெரிவித்ததே இல்லை
அந்த வகையில் வளர்ந்து வரும் நகைச்சுவை நடிகையான வித்யூலேகா, இன்று சூப்பர் ஸ்டார் ரஜினியை அவரது இல்லத்தில் சந்தித்தார். ஒவ்வொரு வருடமும் ரஜினியிடம் ஆசி பெற்று அவரது ஷூட்டிங் கால்ஷீட் புத்தகத்தில் கையெழுத்து வாங்கும் வழக்கம் கொண்ட வித்யூலேகா, இன்று அவரை சந்தித்து கையெழுத்தும் ஆசியும் பெற்றார்
இந்த சந்திப்பு குறித்து வித்யூலேகா தனது சமூக வலைத்தளத்தில் கூறியபோது, 'சூப்பர் ஸ்டாரை சந்தித்த இந்த தினம் மிகவும் அன்பான நாள். ஒவ்வொரு வருடமும் என்னுடைய கால்ஷீட் தேதி புத்தகத்தில் கையெழுத்திடும் ரஜினிகாந்த் அவர்கள் இன்றும் கையெழுத்திட்டு என்னை ஆசிர்வதித்தார். அவரது ஆசியால் இந்த ஆண்டும் எனக்கு நல்ல ஆண்டாக அமையும் என்ற நம்பிக்கை உள்ளது' என்று கூறியுள்ளார்,.