சூப்பர் ஸ்டார் ரஜினிகாந்த் அவர்களின் 65வது பிறந்த தினம் கடந்த 12ஆம் தேதி அவரது ரசிகர்களால் கொண்டாடப்பட்டது. சென்னை உள்பட தமிழக மக்கள் வெள்ளத்தினால் பாதிப்பு அடைந்துள்ள நிலையில் தன்னுடைய பிறந்த நாளை கொண்டாட வேண்டாம் என்றும் அதற்கு பதிலாக தனது ரசிகர்கள் வெள்ள நிவாரண பணியை மேற்கொள்ளும்படியும் ரஜினிகாந்த் கேட்டுக்கொண்டிருந்தார்.

இருப்பினும் ரஜினிகாந்துக்கு திரையுலகினர், அரசியல்வாதிகள், உள்பட ஏராளமானோர் பிறந்தநாள் வாழ்த்து கூறியிருந்தனர். இந்நிலையில் தனக்கு பிறந்த நாள் வாழ்த்து கூறிய அனைவருக்கும் ரஜினிகாந்த் தனது சமூக வலைத்தளத்தில் நன்றி கூறியுள்ளார். குறிப்பாக மேற்குவங்க முதல்வர் மம்தா பானர்ஜி, ஆந்திர முதல்வர் சந்திரபாபு நாயுடு, பாலிவுட் சூப்பர் ஸ்டார் அமிதாப்பச்சன் ஆகியோர்களுக்கு தனது நன்றியை தெரிவித்து கொண்டார்.

மேலும் சென்னைக்குத் தேவையான உதவிகளைச் செய்து வரும் தனது ரசிகர்களுக்கு நன்றி கூறிய ரஜினிகாந்த் இதைத் தாண்டி வேறு எதுவும் தன்னை பெருமைப்படுத்தவோ, மகிழ்ச்சியடையவோ செய்யாது என்றும் கூறியுள்ளார்.