உலகிலேயே இதுதான் முதல்முறை. 'கபாலி' செய்துள்ள இன்னொரு சாதனை
- IndiaGlitz, [Monday,July 11 2016]
சூப்பர் ஸ்டார் ரஜினிகாந்த் நடித்து முடித்துள்ள 'கபாலி' படத்தின் புரமோஷன்கள் இதுவரை இந்திய சினிமா மட்டுமின்றி உலக சினிமாக்கள் கூட கண்டிராத வகையில் வானத்திற்கும் பூமிக்கும் புரமோஷன்கள் செய்யப்பட்டு வருகின்றன. ஏர் ஆசியா, ஃபைவ் ஸ்டார் சாக்லேட், ஏர்டெல் ஆகியவை இதுவரை கண்டிராத புரமோஷன்கள். அந்த வகையில் தற்போது இன்னொரு வித்தியாசமான புரமோஷனும் இணைந்துள்ளது.
'கபாலி'யின் பெயரில் தற்போது மாரத்தான் போட்டி ஒன்றை நடத்த திட்டமிடப்பட்டுள்ளது. வரும் 31ஆம் தேதி மலேசியாவில் உள்ள SEPANG INTERNATIONAL CIRCUIT என்ற இடத்தில் நடத்த திட்டமிட்டுள்ள இந்த மாரத்தான் போட்டி ஆண்கள், பெண்கள், என தனித்தனியான போட்டிகள் நடத்தப்படவுள்ளன. ஐந்து கிமீ தூரம் உள்ள மாரத்தான் போட்டியில் கலந்து கொள்ள பெயர்கள் பதிவு செய்யப்பட்டு வருகின்றன.
உலகிலேயே ஒரு திரைப்படத்தின் பெயரில் மாரத்தான் போட்டி நடத்தப்படுவது இதுதான் முதல்முறை. தலைவர் படம் என்றால் வசூலில்தான் சாதனை செய்யும் என்று இதுவரை பார்த்துள்ளோம். ஆனால் முதல்முறையாக வித்தியாசமான புரமோஷன்களில் வெளிவரும் திரைப்படம் 'கபாலி'தான் என்பது குறிப்பிடத்தக்கது. இன்னும் ரிலீசுக்கு பத்து நாட்களுக்கும் மேல் உள்ள என்னென்ன அதிசயங்கள் நடைபெறவுள்ளது என்பதை பொறுத்திருந்து பார்ப்போம்.