முன்னாள் முதல்வர்கள் ஜெயலலிதா மற்றும் கருணாநிதி ஆகிய இருவரிடமும் நல்ல நட்புடன் உள்ள மிகச்சிலரில் சூப்பர் ஸ்டார் ரஜினிகாந்த் அவர்களும் ஒருவர். சமீபத்தில் முன்னாள் முதல்வர் ஜெயலலிதா மறைந்தபோது அவரது உடலுக்கு அஞ்சலி செலுத்தி தனது ஆழ்ந்த இரங்கலை தெரிவித்த ரஜினிகாந்த் நேற்று தனது நெருக்கமான நண்பரான கருணாநிதியை சந்தித்து உடல்நலம் விசாரித்தார்

கடந்த சிலநாட்களுக்கு முன்னர் மருத்துவமனையில் இருந்து டிஸ்சார்ஜ் ஆகி ஓய்வு எடுத்து வரும் கருணாநிதியை நேற்று ரஜினிகாந்த் சந்தித்து நலம் விசாரித்தார். அவருடன் கருணாநிதியின் இன்னொரு நண்பரான வைரமுத்துவும் உடனிருந்தார் என்பது குறிப்பிடத்தக்கது.

ரஜினிகாந்த், வைரமுத்து ஆகிய இருவரையும் கருணாநிதியின் மகனும் எதிர்க்கட்சி தலைவருமான மு.க.ஸ்டாலின் வரவேற்றார்.

இந்நிலையில் ஜெயலலிதாவின் மறைவையொட்டி நாளை தனது பிறந்த நாளை கொண்டாட வேண்டாம் என்று தனது ரசிகர்களிடம் ரஜினிகாந்த் வேண்டுகோள் விடுத்துள்ளார் என்பது குறிப்பிடத்தக்கது.