కె.సి.ఆర్ కి అదిరిపోయే కితాబిచ్చిన కృష్ణ
- IndiaGlitz, [Wednesday,July 13 2016]
తెలంగాణ రాష్ట్ర ముఖ్య‌మంత్రి కె.సి.ఆర్ పిలుపు మేర‌కు హ‌రిత‌హారం కార్య‌క్ర‌మంలో భాగంగా సినీ ప్ర‌ముఖులు మొక్క‌లు నాటిన విష‌యం తెలిసిందే. తాజాగా ఈ కార్య‌క్ర‌మంలో భాగంగా సూప‌ర్ స్టార్ కృష్ణ, విజ‌య‌నిర్మ‌ల, న‌రేష్ ల‌తో క‌లిసి నాన‌క్ రామ్ గూడ‌లోని ప్ర‌భుత్వ ప్రాథిమికోన్న‌త పాఠ‌శాల‌లో మొక్క‌లు నాటారు.
ఈ సంద‌ర్భంగా కృష్ణ స్పందిస్తూ...నాడు అశోకుడు రోడ్ల‌కు ఇరువైపుల చెట్లు నాటించిన‌ట్టు చ‌రిత్ర పుస్త‌కాల్లో చదువుకున్నాం. నాటి అశోకుడులా నేడు కె.సి.ఆర్ అంద‌రితో మొక్క‌లు నాటిస్తుండ‌డం చూస్తున్నాం. ఇలా అంద‌రిలో చైత‌న్యం తీసుకువ‌చ్చి మొక్క‌లు నాటిస్తున్న సి.ఎం కె.సి.ఆర్ కు అభినంద‌న‌లు తెలియ‌చేస్తున్నాను అన్నారు. శ్రీమ‌తి విజ‌య‌నిర్మ‌ల కూడా స్పందిస్తూ... నాకు మొక్క‌లు, చెట్లు అంటే చాలా ఇష్టం. అందుక‌నే మా ఇంట్లో వంద‌ల ర‌కాల మొక్క‌ల‌ను పెంచుతున్నాను. ప్ర‌తి ఒక్క‌రు ఈ కార్య‌క్ర‌మంలో పాల్గొని మొక్క‌లు నాటాలి అన్నారు. కె.సి.ఆర్ సినిమా ప‌రిశ్ర‌మ అభివృద్దికి 2,000 ఏక‌రాలు కేటాయించి ఫిల్మ్ సిటీ నిర్మిస్తాన‌ని ప్ర‌క‌టించిన‌ప్పుడు ఆ ఫిల్మ్ సిటీకి కె.సి.ఆర్ పేరు పెట్టాలి అని స్పందించిన సూప‌ర్ స్టార్ కృష్ణ.... ఇప్పుడు హ‌రిత‌హారం కార్య‌క్ర‌మం చేప‌ట్టినందుకు కె.సి.ఆర్ ని అశోకుడు తో పోల్చి ప్ర‌శంస‌ల వ‌ర్షం కురిపిస్తుండ‌డం విశేషం.