முன்பு குரூப் போட்டோ.. இப்போது குரூப் உடன் போட்டோ.. பேருந்து பணிமனைக்கு ரஜினியின் திடீர் விசிட்..!
- IndiaGlitz, [Tuesday,August 29 2023]
சூப்பர் ஸ்டார் ரஜினிகாந்த் திரையுலகில் அறிமுகமாவதற்கு முன்பு பெங்களூரில் அரசு போக்குவரத்து கழக பேருந்தில் கண்டக்டர் ஆக வேலை செய்த நிலையில் தற்போது தான் பணிபுரிந்த பேருந்து பணிமனைக்கு சென்று திடீர் விசிட் அடித்தது பரபரப்பை ஏற்படுத்தி உள்ளது.
சூப்பர் ஸ்டார் ரஜினிகாந்த் கே. பாலச்சந்தர் இயக்கத்தில் உருவான ’அபூர்வ ராகங்கள்’ என்ற திரைப்படத்தில் ஒரு சின்ன கேரக்டரில் அறிமுகம் ஆகி அதன்பின் வில்லன், குணசித்திர கேரக்டரில் நடித்து சூப்பர் ஸ்டாராக உயர்ந்தார். கடந்த 45 ஆண்டுகளாக அவர் தமிழ் திரையுலகில் முன்னணி நடிகராக உள்ளார் என்பதும் தற்போது கூட அவரது படம் 500 கோடி வசூல் செய்யும் அளவுக்கு உள்ளது என்பது குறிப்பிடத்தக்கது.
இந்த நிலையில் திரையுலகத்திற்கு வருவதற்கு முன்பு அவர் பெங்களூர் பேருந்தில் நடத்துனராக பணிபுரிந்த நிலையில் இன்று அவர் திடீரென்று தான் பணிபுரிந்த பணிமனைக்கு சென்று இன்ப அதிர்ச்சி கொடுத்தார். அவருடன் அந்த பணிமனையில் இருந்தவர்கள் போட்டி போட்டுக் கொண்டு புகைப்படம் எடுத்துக் கொண்டார்கள்.
இதே பணிமனையில் அவர் வேலை செய்த போது குரூப்பாக எடுத்துக் கொண்ட புகைப்படத்தையும் தற்போது அவரை சுற்றி பணிமனை ஊழியர்கள் குரூப்பாக நின்று கொண்டு எடுத்த புகைப்படத்தையும் ரஜினி ரசிகர்கள் இணையத்தில் பகிர்ந்து வருகிறார்கள். பஸ் கண்டக்டர் முதல் சூப்பர்ஸ்டார் வரை என்றும் இந்த புகைப்படங்களுக்கு கேப்ஷன் ஆக பதிவு செய்யப்பட்டு வருகிறது.
மேலும் பெங்களூரில் உள்ள ஸ்ரீ ராகவேந்திரா சுவாமி கோவிலுக்கு ரஜினிகாந்த் சென்று சுவாமி வழிபட்டார் என்பது குறிப்பிடத்தக்கது.