சூப்பர் ஸ்டார் ரஜினி நடித்த ‘சிவாஜி’ படத்தில் வில்லனாக நடித்தவர் நடிகர் சுமன் என்பதும் இவர் பல தமிழ் தெலுங்கு திரைப்படங்களில் ஹீரோவாக நடித்து உள்ளார் என்பதும் தெரிந்ததே. இந்த நிலையில் நடிகர் சுமன் திடீரென இறந்துவிட்டதாக யூடியூபில் வதந்திகள் பரவிய நிலையில் தான் நலமாக இருப்பதாக அவர் பேட்டியளித்துள்ளார்.

சமீபத்தில் வெளியான ’தி லெஜன்ட்’ உள்பட பல திரைப்படங்களில் நடித்தவர் நடிகர் சுமன். இவர் திடீரென்று காலமாகி விட்டதாக யூடியூப் உள்ளிட்ட சமூக வலைத்தளங்களில் செய்தி பரவியது.

இதனால் ரசிகர்கள் அதிர்ச்சி அடைந்த நிலையில் நடிகர் சுமன் இது குறித்து விளக்கமளித்துள்ளார். நான் நன்றாகத்தான் இருக்கிறேன், நான் இறந்துவிட்டேன் என்று இணையத்தில் வெளியான செய்தி குறித்து நண்பர்கள் மூலம் எனக்கு தெரிய வந்தது, பணத்துக்காக இதுபோன்ற பொய்யான செய்திகளை சில யூடியூப் சேனல்கள் பரப்புகின்றனர். இந்த வதந்தியை யாரும் நம்ப வேண்டாம். பொய்யான தகவலை பரப்பிய யூடியூப் சேனலுக்கு எதிராக வழக்கு தொடர உள்ளேன் என்று தெரிவித்துள்ளார்.