சூப்பர் ஸ்டார் ரஜினிகாந்த் நடித்த '2.0' படத்தின் டிரைலர் மிகப்பெரிய எதிர்பார்ப்புகளுக்கு மத்தியில் சற்றுமுன் வெளியாகியுள்ளது. 2.01 நிமிடங்கள் இந்த டிரைலர் படத்தின் மிகப்பெரிய எதிர்பார்ப்பை ஏற்படுத்தியுள்ளது.

இந்த படத்தின் டீசரில் இருந்தபடியே முதல் காட்சியிலேயே செல்போன்கள் திடீர் மாயமாகும் காட்சி தோன்றுகிறது. மொத்த செல்போன்களையும் தனது கட்டுப்பாட்டுக்குள் கொண்டு வரும் அக்சயகுமார், 'செல்போன் வச்சிருக்கின்ற ஒவ்வொருத்தனும் கொலைகாரனுங்க..அத பார்த்தாலே மனுஷங்க ஓடப்போறாங்க பாரு' என்று பேசும் வசனம் ஆகியவை இந்த படத்தின் கதையை ஊகிக்க வைக்கின்றது. குறிப்பாக ரஜினிகாந்த், 'சிட்டி உயிரோட,,,வெர்ஷன் 2.0 என்று கூற அதற்கு அக்சயகுமார் பார்க்கும் ஆழமான பார்வையில் ஆயிரம் அர்த்தங்கள் மறைந்துள்ளன.

எமி ஜாக்சனின் ரோபோட் வடிவம், சிட்டி ரஜினியின் டிஜிட்டல் அட்டகாசங்கள், அக்சயகுமாரின் ஆவேசம், கிராபிக்ஸ் மிரட்டல்கள், ரஹ்மானின் பிரமாண்டமான பின்னணி இசை, நீரவ் ஷாவின் சர்வதேச தரமான ஒளிப்பதிவு என இந்த டிரைலரில் உள்ள அம்சங்களையே அடுக்கி கொண்டே போகலாம் என்ற நிலையில் முழு படமும் எப்படி இருக்கும் என்பதை கற்பனை செய்து பார்க்க முடிகிறது.

சுமார் 600 கோடி பட்ஜெட்டில் உருவாகியிருக்கும் இந்த படம் ஹாலிவுட் தரம் என்று சொல்வதை விட ஷங்கர் பாணியில் 'அதுக்கும் மேல' என்று தான் கூற வேண்டும்