பாலிவுட் திரையுலகின் கவர்ச்சி நடிகை சன்னி லியோன் தற்போது ‘வீரமாதேவி’ மற்றும் ‘ஓ மை கோஸ்ட்’ ஆகிய இரண்டு தமிழ் திரைப்படங்களில் நடித்து வருகிறார் என்பதும் இதில் ’ஓ மை கோஸ்ட்’ திரைப்படம் விரைவில் வெளியாக உள்ளது என்பதும் தெரிந்ததே.

இந்த நிலையில் சன்னி லியோன் நடிக்கும் இன்னொரு தமிழ் படம் குறித்த தகவல் தற்போது வெளியாகியுள்ளது. டிஜே ஜெய முருகன் என்பவர் இயக்கத்தில் மனிதன் சினி ஆர்ட்ஸ் நிறுவனத்தின் தயாரிப்பில் உருவாகி வரும் திரைப்படம் ’தீ இவன்’. இந்த படத்தில் ஒரு முக்கிய கேரக்டரில் சன்னி லியோன் நடிக்க இருப்பதாக படக்குழுவினர் அதிகாரப்பூர்வமாக அறிவித்துள்ளனர். இது குறித்த புகைப்படம் இணையதளங்களில் வைரலாகி வருகிறது.

இந்த படத்தில் நவரச நாயகன் கார்த்திக் நாயகனாக நடிக்கும் நிலையில் அவருடன் 28 ஆண்டுகள் கழித்து நடிகை சுகன்யா ஜோடியாக நடிக்கிறார். ஏற்கனவே இருவரும் கடந்த 1996ஆம் ஆண்டு வெளியான ’சீமான்’ என்ற படத்தில் இணைந்து நடித்த நிலையில் தற்போது மீண்டும் இணைந்து உள்ளனர்.

மேலும் இந்த படத்தில் ராதாரவி, சுமன், ஸ்ரீதர் உள்பட பலர் நடிக்கின்றனர். இந்த படத்தின் படப்பிடிப்பு விறுவிறுப்பாக நடைபெற்று வருவதாகவும் விரைவில் இந்த படத்தின் படப்பிடிப்பு முடிவடையும் என்று கூறப்படுகிறது. இந்த படத்தில் சன்னி லியோன் இணைந்து உள்ளதை அடுத்து இந்த படம் எதிர்பார்ப்பை அதிகரித்துள்ளது என்பது குறிப்பிடத்தக்கது.