பிரபல பாலிவுட் நடிகை சன்னி லியோன் ஒரு தமிழ் திரைப்படத்தில் நடித்து வருகிறார் என்பதும் சதீஷ் மற்றும் தர்ஷா குப்தா முக்கிய வேடத்தில் நடித்து வரும் இந்தப் படத்தின் டைட்டில் ’ஓ மை கோஸ்ட்’ என்று வைக்கப்பட்டுள்ளதாகவும் வெளிவந்த செய்தியை ஏற்கனவே பார்த்தோம்.

இந்த நிலையில் இந்த படத்தின் முதல் கட்ட படப்பிடிப்பு சென்னையில் நடந்த நிலையில் அடுத்தகட்ட படப்பிடிப்பு சமீபத்தில் மும்பையில் தொடங்கியது. கடந்த சில நாட்களாக சன்னி லியோன் இந்த படத்தின் படப்பிடிப்பில் கலந்து கொண்ட நிலையில் தற்போது மும்பை படப்பிடிப்பு முடிவடைந்ததாக தகவல்கள் வெளியாகி உள்ளன. இந்த படத்தின் மும்பை படப்பிடிப்பு முடிவடைந்ததை அடுத்து சன்னி லியோன் உள்பட படக்குழுவினர் அனைவரும் கேக் வெட்டி கொண்டாடிய காட்சியின் புகைப்படம் தற்போது இணையதளங்களில் வைரலாகி பரவியது என்பது குறிப்பிடத்தக்கது.

திகில் மற்றும் காமெடி படமாகவும், வரலாற்று பின்னணி கொண்ட கதையம்சம் கொண்ட படமாக உருவாகி வரும் இந்த திரைப்படத்தின் அடுத்தகட்ட படப்பிடிப்பு விரைவில் தொடங்கும் என்று எதிர்பார்க்கப்படுகிறது.