క‌మెడియ‌న్ నుండి హీరోగా మారిన సునీల్‌కు అందాల రాముడు, పూల‌రండు, మ‌ర్యాద‌రామ‌న్న వంటి రెండు, మూడు త‌ప్ప చెప్పుకునేంత విజ‌యాలు లేక‌పోవ‌డంతో మ‌ళ్లీ క‌మెడియ‌న్‌గా మారిపోయాడు. క‌మెడియ‌న్‌గా సునీల్ టైమింగ్ గురించి చెప్ప‌న‌క్క‌ర్లేదు. దాంతో సునీల్‌కు మంచి అవ‌కాశాలే వ‌స్తున్నాయి. క్ర‌‌మంగా క‌మెడియ‌న్‌గా బిజీగా మారుతున్న స‌మ‌యంలో ఇప్పుడు సునీల్‌కు హీరోగా సినిమా అవ‌కాశం వ‌చ్చింద‌ట‌. వివ‌రాల్లోకెళ్తే.. క‌న్న‌డంలో గ‌త ఏడాది విడుద‌లై విజ‌య‌వంత‌మైన చిత్రాల్లో బెల్‌బాట‌మ్ ఒక‌టి. రిషబ్‌శెట్టి ఇందులో హీరోగా న‌టించాడు. కామెడీతో క‌ల‌గ‌ల‌సిన స్పై ఎంట‌ర్‌టైన‌ర్‌గా ఈ సినిమా క‌న్న‌డలో మంచి స‌క్సెస్‌ను ద‌క్కించుకుంది. ఈ సినిమా రీమేక్ హ‌క్కుల‌ను తెలుగులో ఓ ప్ర‌ముఖ నిర్మాణ సంస్థ ద‌క్కించుకుంద‌ట‌.

ఈ సంస్థ సునీల్ హీరోగా ఈ సినిమాను చేయాల‌ని అనుకుంటుంద‌ట‌. అందుకు సంబంధించి ఇప్ప‌టికే సునీల్‌తో చ‌ర్చ‌లు కూడా జ‌రుగుతున్నాయని సినీ వ‌ర్గాల్లో వినిపిస్తోన్న స‌మాచారం. అంతా ఓకే అయితే సునీల్ హీరోగా ఓ సినిమా సెట్స్‌పైకి వెళ్లే అవ‌కాశం ఉంద‌ని టాక్‌. అయితే సునీల్ హీరోగా మారి, స‌క్సెస్‌లు రాన‌ప్పుడు ఎలాంటి విమ‌ర్శ‌ల‌ను ఎదుర్కొన్నాడో అత‌నికి గుర్తుంద‌ని కాబ‌ట్టి అత‌ను హీరోగా చేయ‌క‌పోవ‌చ్చుననే ఓ వ‌ర్గం వారు అంటున్నారు. నిజానిజాలు తెలియాలంటే కొన్నాళ్లు వెయిటింగ్ తప్పదు..