தமிழ் திரையுலகின் முன்னணி கமர்ஷியல் இயக்குனரான சுந்தர் சி விரைவில் பாலிவுட்டில் ஒரு படம் இயக்க இருப்பதாகவும் இந்த படம் ‘அரண்மனை’ படத்தின் ஒரு பாகத்தின் ரிமேக் என்றும் கூறப்படுகிறது.

தமிழ் சினிமாவின் கலர்ஃபுல்லான மற்றும் கமர்ஷியல் இயக்குனர் சுந்தர் சி பல வெற்றி படங்களை இயக்கி உள்ளார் என்பதும் இவர் சமீபத்தில் ’அரண்மனையில் 4’ என்ற படத்தை இயக்கி உள்ள நிலையில் இந்த படம் அடுத்த மாதம் வெளியாக வாய்ப்பிருப்பதாக கூறப்படுகிறது.

இந்த நிலையில் சுந்தர் சி இயக்கும் அடுத்த படம் தமிழில் தான் என்று எதிர்பார்க்கப்பட்ட நிலையில் அவர் பாலிவுட்டில் ஒரு திரைப்படம் இயக்க இருப்பதாக தகவல் வெளியாகி உள்ளது. பிரபல பாலிவுட் நடிகர் அக்சயகுமாருக்கு அவர் சமீபத்தில் ‘அரண்மனை’ படத்தின் கதையை கூறியதாகவும் அந்த கதை அவருக்கு பிடித்து விட்டதை அடுத்து, சுந்தர் சி இயக்கத்தில் நடிக்க அக்சயகுமார் ஒப்புக்கொண்டதாகவும், விரைவில் இந்த படத்தின் அறிவிப்பு வெளியாகும் என்றும் தெரிகிறது.

அக்சயகுமார் உடன் இந்த படத்தில் இன்னொரு பாலிவுட் பிரபலமான பாபி தியோல் இணைய இருப்பதாகவும் இந்த படம் பாலிவுட்டில் பிரம்மாண்டமாக உருவாகும் என்றும் மற்ற நட்சத்திரங்களின் தேர்வு குறித்த தகவல் விரைவில் வெளியாகும் என்றும் கூறப்படுகிறது.

ஏற்கனவே அட்லி, ஏஆர் முருகதாஸ் உள்பட ஒரு சில தமிழ் இயக்குனர்கள் பாலிவுட் பக்கம் சென்று கொண்டிருக்கும் நிலையில் அடுத்ததாக சுந்தர் சியும் செல்ல உள்ளார் என்பது குறிப்பிடத்தக்கது.