சூப்பர் ஸ்டார் ரஜினிகாந்த் நடிப்பில், சன் பிக்சர்ஸ் நிறுவனத்தின் தயாரிப்பில் உருவாகி வரும் திரைப்படம் ’ஜெயிலர்’. இந்த படத்தின் படப்பிடிப்பு முடிவடைந்து தற்போது இறுதி கட்ட தொழில்நுட்ப பணிகள் நடைபெற்று வருகின்றன.

ஆகஸ்ட் 10ஆம் தேதி உலகம் முழுவதும் வெளியாக இருக்கும் இந்த படத்திற்கு நல்ல எதிர்பார்ப்பு ஏற்பட்டிருக்கும் நிலையில் சமீபத்தில் இந்த படத்தில் இடம்பெற்ற ’காவாலா’ என்ற பாடல் வெளியானது.

இந்த பாடலில் தமன்னாவின் கிளாமர் நடனம் இணையதளங்களில் வைரல் ஆகி வந்தது என்பதும் குழந்தைகள் முதல் பெரியவர் வரை இந்த பாடலுக்கு நடனமாடிய வீடியோ சமூக வலைதளத்தில் பதிவு செய்யப்பட்டது என்பதும் தெரிந்ததே.

இந்த நிலையில் இந்த பாடல் வெளியாகி ஒரு சில நாட்களில் 30 மில்லியன் பார்வையாளர்களை பெற்றுள்ள நிலையில் தற்போது சன் பிக்சர்ஸ் தனது சமூக வலைத்தளத்தில் இந்த பாடலின் மேக்கிங் வீடியோவை வெளியிட்டுள்ளது. இதில் தமன்னாவுக்கு டான்ஸ் ஸ்டெப்ஸ்களை நடன இயக்குனர் கற்று கொடுக்கும் காட்சிகள் உட்பட சில சுவாரஸ்யமான காட்சிகள் உள்ளன. ஒரு நிமிடத்திற்கு மேலாக இருக்கும் இந்த மேக்கிங் வீடியோ தற்போது இணையத்தில் வைரல் ஆகி வருகிறது.

ரஜினிகாந்த், சிவராஜ்குமார், மோகன்லால், தமன்னா, ரம்யா கிருஷ்ணன், சுனில், ஜாக்கி ஷெராப், வசந்த் ரவி, விநாயகன், யோகிபாபு, ரெடின் கிங்ஸ்லி, உட்பட பலர் நடித்து வரும் இந்த படத்திற்கு விஜய் கார்த்திக் கண்ணன் ஒளிப்பதிவும், நிர்மல் படத்தொகுப்பும் செய்து வருகின்றனர். இந்த படத்திற்கு அனிருத் இசையமைத்து வருகிறார்.