நோட்டீஸ் எதிரொலி: 'சர்கார்' படக்குழுவினர் எடுத்த அதிரடி முடிவு
- IndiaGlitz, [Friday,July 06 2018]
தளபதி விஜய் நடித்து வரும் 'சர்கார்' படத்தின் ஃபர்ஸ்ட்லுக் போஸ்டர் விஜய் பிறந்த நாளை முன்னிட்டு கடந்த மாதம் 21ஆம் தேதி வெளிவந்தது. இந்த போஸ்டரில் விஜய் சிகரெட் புகைப்பது போன்ற போஸில் இருந்தார். இந்த போஸ்டர் ரசிகர்களின் பேராதரவை பெற்றபோதிலும் புகை பிடிக்கும் போஸ்டருக்கு அரசியல் தலைவர்கள் கடும் கண்டனம் தெரிவித்தனர். குறிப்பாக பாமக இளைஞரணி தலைவர் டாக்டர் அன்புமணி, இந்த போஸ்டரை சமூக வலைத்தளத்தில் இருந்து நீக்க வேண்டும் என்று கோரிக்கை விடுத்திருந்தார்.
இந்த நிலையில் விஜய், ஏ.ஆர்.முருகதாஸ் உள்பட படகுழுவினர்களுக்கு இன்று தமிழக அரசின் பொது சுகாதாரத்துறை நோட்டீஸ் அனுப்பியிருந்தது. இந்த நோட்டீஸில் ‘சர்கார்’ படத்தின் போஸ்டரில், விஜய் புகைப்பிடிப்பதுபோல் உள்ள காட்சிகளை நீக்க வேண்டும் என அறிவுறுத்தியிருந்தது.
இந்த நோட்டீஸ் எதிரொலியாக விஜய் புகைப்பது போன்று வெளியிட்ட சர்கார் பட போஸ்டர்களையும் ஃபர்ஸ்ட் லுக்கையும் இந்த படத்தின் தயாரிப்பு நிறுவனமான சன் பிக்சர்ஸ் நிறுவனம் தனது அதிகாரப்பூர்வ டுவிட்டர் பக்கத்திலிருந்து நீக்கியுள்ளது. இதனையடுத்து இந்த பிரச்சனை முடிவுக்கு வந்ததாக கருதப்படுகிறது.