பிக்பாஸ் மூலம் புகழ் பெற்ற நடிகை சுஜாவருணி, சிவாஜிகணேசன் பேரனும் ராம்குமார் மகனுமாகிய சிவாஜிதேவ்வை காதலிப்பதாக செய்திகள் வெளிவந்து கொண்டிருந்தது. சமீபத்தில் கூட திருப்பதியில் இருவரும் இணைந்து எடுத்த புகைப்படங்கள் இணையத்தில் வைரலானதோடு இருவருக்கும் நிச்சயமாகிவிட்டதாகவும் கூறப்படுகிறது.

இந்த நிலையில் இதுகுறித்து தனது சமூக வலைத்தளத்தில் விளக்கம் அளித்துள்ள சிவாஜிதேவ், 'சுஜாவின் ரசிகர்களுக்கும் மீடியா நண்பர்களுக்கும் தெரிவித்து கொள்வது என்னவெனில் நானும் சுஜாவும் 11 வருடங்களாக காதலித்து வருவது உண்மைதான். எனது இயற்பெயர் ஷிவகுமார். எனது தாயார் இரண்டு ஆண்டுகளுக்கு முன் மரணம் அடைந்த பின்னர் சிவாஜிதேவ் என்ற என் பெயரை ஷிவகுமார் என்று அவருடைய ஆசியுடன் மாற்றி கொண்டேன். இனி இந்த பெயரில்தான் திரையுலகிலும் நடிக்கவுள்ளேன்.

மேலும் பிக்பாஸ் நிகழ்ச்சியின்போது சுஜா குறிப்பிட்ட 'அத்தான் 'நான் தான். நாங்கள் இருவரும் விரைவில் எங்கள் திருமண அறிவிப்பு குறித்த தகவலை வெளியிடவுள்ளோம். அதுவரை எங்களது தனிப்பட்ட விருப்பங்களுக்குக் மதிப்பு கொடுத்து அமைதி காக்குமாறு மீடியா நண்பர்களை கேட்டுக்கொள்கிறேன்' என்று தனது சமூக வலைத்தளத்தில் கூறியுள்ளார். ஷிவகுமார் தான் பதிவு செய்த டுவிட்டுக்கள் அனைத்தையும் சுஜா வருணி ரீடுவீட் செய்துள்ளதால் இந்த செய்தி உண்மை என்றே உறுதி செய்யப்படுகிறது.