'కాలింగ్ సహస్త్ర' అంటున్న సుడిగాలి సుధీర్.. న‌వంబ‌ర్‌లో విడుద‌ల
- IndiaGlitz, [Wednesday,October 25 2023]
బుల్లి తెర ప్రేక్షకుల‌ను అల‌రించి తిరుగులేని ఇమేజ్‌ను సంపాదించుకున్న సుడిగాలి సుధీర్ ఇప్పుడు సిల్వర్ స్క్రీన్‌పై కూడా అభిమానులను మెప్పిస్తున్నారు. ‘గాలోడు’ చిత్రంతో హిట్ కొట్టిన సుధీర్ కథానాయకుడిగా నటించిన తాజా చిత్రం ‘కాలింగ్ సహస్త్ర’. అరుణ్ విక్కిరాలా ద‌ర్శక‌త్వంలో షాడో మీడియా ప్రొడక్షన్స్‌, రాధా ఆర్ట్స్ ప‌తాకాల‌పై విజేష్ త‌యాల్‌, చిరంజీవి ప‌మిడి, వెంకటేశ్వర్లు కాటూరి ఈ సినిమాను నిర్మిస్తున్నారు. గాలోడు చిత్రంలో మాస్ హీరోగా ఆక‌ట్టుకున్న సుధీర్ ఈసారి వైవిధ్యమైన పాత్రలో కనిపించనున్నారు. మూవీలో సుధీర్ స‌ర‌స‌న డాలీషా హీరోయిన్‌గా న‌టిస్తోంది. ఈ సినిమా పోస్ట్ ప్రొడక్షన్ కార్యక్రమాల‌ను పూర్తి చేసుకుంది.
ఈ సందర్భంగా చిత్ర నిర్మాత వెంకటేశ్వర్లు కాటూరి మాట్లాడుతూ ‘‘నిర్మాతలుగా ‘కాలింగ్ సహస్త్ర’ మా తొలి అడుగు. మాకు ఇదొక స్వీట్ మెమొరీ. డైరెక్టర్ అరుణ్‌గారు, హీరో సుధీర్ గారు, హీరోయిణ్ డాలీషా గారి స‌పోర్ట్‌తో సినిమాను పూర్తి చేశాం. మూవీ అవుట్ పుట్ సూప‌ర్‌గా వ‌చ్చింది. ఈ సినిమాలో స‌రికొత్త సుధీర్‌ను చూస్తార‌ని న‌మ్మకంగా చెబుతున్నాను. ఇందులో సుధీర్ పాత్రను వెండితెర‌పై చూసిన ఆడియెన్స్ వామ్మో సుధీర్ ఇలాంటి పాత్రలో కూడా న‌టిస్తారా అనేంత వైల్డ్‌గా, థ్రిల్లింగ్ ఎలిమెంట్‌తో, మాసీగా ఉంటుంది. ప్రేక్షకులు ఊహించ‌ని మ‌లుపులతో సీట్ ఎడ్జ్ థ్రిల్లర్‌గా ఆక‌ట్టుకోనుంది మా మూవీ. పోస్ట్ ప్రొడక్షన్ కార్యక్రమాలు పూర్తయ్యాయి. న‌వంబ‌ర్‌లో సినిమాను విడుద‌ల చేయ‌టానికి స‌న్నాహాలు చేస్తున్నాం’’ అని తెలిపారు.
ఈ సినిమాలో ఆనంద్ బయానా, శివబాలాజీ మనోహరన్, రవితేజ నన్నిమాల త‌దిత‌రులు నటించారు. మార్క్.కె.రాబిన్ సినిమాకు సంగీతం అందించారు. సన్ని.డి సినిమాటోగ్రఫీగా పనిచేశార. గ్యారీ బి.హెచ్‌ ఎడిటర్‌గా, మోహిత్ రేహమేనియాక్ పాటలు రాయగా, బియాండ్ మీడియాకు చెందిన నాయుడు సురేంద్ర ఫ‌ణి పీఆర్ఓగా వ్యవహరించారు.