ரஜினிகாந்த் கட்சி தொடங்க மாட்டார்: சொல்வது யார் தெரியுமா?
- IndiaGlitz, [Monday,July 23 2018]
சூப்பர் ஸ்டார் ரஜினிகாந்த் கடந்த ஆண்டு டிசம்பர் 31ஆம் தேதி அரசியல் கட்சியை தொடங்கவிருப்பதாக அறிவித்தார். ஆன்மீக அரசியலில் தான் குதிக்கவுள்ளதாகவும், வரும் தேர்தலில் 234 தொகுதிகளிலும் தனது கட்சி போட்டியிடும் என்றும் அறிவித்தார். இதனையடுத்து ரஜினி மக்கள் மன்றம் ஆரம்பித்து அதன் நிர்வாகிகள் நியமனம் செய்வதிலும் பிசியாக ஈடுபட்டார். எனவே அவர் எந்த நேரத்திலும் புதிய அரசியல் கட்சி குறித்த அறிவிப்பை வெளியிடுவார் என்று கூறப்படுகிறது.
அதே நேரத்தில் அதிமுகவின் தலைமை பொறுப்பை ஏற்க அதிமுக மேலிடம் ரஜினிக்கு அழைப்பு விடுத்துள்ளதாகவும் புதிய கட்சி ஆரம்பிப்பதற்கு பதிலாக அவர் அதிமுகவின் தலைமையை ஏற்று பாஜகவுடன் கூட்டணி வைத்து தேர்தலை சந்திப்பார் என்றும் கூறப்பட்டு வருகிறது.
இந்த நிலையில் தேமுதிக தலைவர் விஜயகாந்தின் உறவினரான சுதீஷ், ரஜினி அரசியலுக்கு வரமாட்டார் என்றும் அவர் கட்சி தொடங்க மாட்டார் என்றும் பேட்டி ஒன்றில் தெரிவித்துள்ளார். ரஜினியின் அரசியல் குறித்து பல்வேறு கருத்துக்கள் பரவி வருவதால் இதனை தவிர்க்க எந்த ஒரு முடிவாக இருந்தாலும் இதுகுறித்து அவரே ஒரு தீர்க்கமான முடிவை அறிவிக்க வேண்டும் என்பதே அனைவரது எதிர்பார்ப்பாக உள்ளது.