சினிமா கூத்தாடிகளால் வெற்றிடத்தை நிரப்ப முடியாது: சுப்பிரமணியன் சுவாமி
- IndiaGlitz, [Saturday,November 23 2019]
தமிழகத்தில் ஏற்பட்டுள்ள அரசியல் ஆளுமை வெற்றிடத்தை கமல்-ரஜினி கூட்டணி நிரப்பும் என கூறப்பட்டு வரும் நிலையில் அந்த வெற்றிடத்தை சினிமா கூத்தாடிகளால் நிரப்ப முடியாது என பாஜக மூத்த தலைவர் சுப்பிரமணியன் சுவாமி தெரிவித்துள்ளார்.
இன்று சென்னையில் செய்தியாளர்களை சந்தித்த சுப்பிரமணியன் சுவாமி, கமல், ரஜினி அரசியல் குறித்து கூறியபோது, ‘சினிமா கூத்தாடிகளால் தமிழகத்திற்கு எந்த நலனும் இருக்காது என்றும் நடிகர்கள் தங்களது திரைப்படம் வெளியாகும் போது விளம்பரத்திற்காக அரசியலுக்கு வருவதாக கூறி வருகின்றார்கள் என்றும் பலமுறை அரசியலுக்கு வர போவதாக அவர்கள் கூறியிருந்தும் எதுவும் நடக்கவில்லை என்றும் கூறினார். மேலும் நடிகர்கள் அரசியலுக்கு வருவதாக சொல்வதை கேட்டு அலுத்து போய்விட்டதாகவும் அவர் கேள்வி ஒன்றுக்கு பதிலளித்தார்.
மேலும் சசிகலா முன்கூட்டியே சிறையில் இருந்து வெளியே வருவாரா? என்பது குறித்து தனக்கு தெரியாது என்றும், ஆனால் அவர் வெளியே வந்தவுடன் அதிமுகவினர் அவர் பின்னால் செல்ல வாய்ப்பு இருப்பதாக நான் எதிர்பார்க்கின்றேன்’ என்றும் கேள்வி ஒன்றுக்கு பதிலளித்தார்
ஒட்டுமொத்த சினிமா துறையினர்களையும் சினிமா கூத்தாடிகள் என்று சுப்பிரமணியன் சுவாமி கிண்டல் செய்திருக்கும் நிலையில் திரையுலகினர் யாரும் இதுவரை சுவாமிக்கு கண்டனம் தெரிவிக்கவில்லை என்பது குறிப்பிடத்தக்கது