மோகன்லால் நடிப்பில் ஜீத்துஜோசப் இயக்கிய 'த்ரிஷ்யம்' படத்தில் மோகன்லால் ஒரு கொலையை செய்துவிட்டு அந்த பிணத்தை கட்டுமானப்பணி நடைபெற்று கொண்டிருந்த காவல்நிலையத்தில் புதைத்துவிடுவார். அந்த பிணம் கைப்பற்றப்படும் வரை இந்த வழக்கை தொடர முடியாது என்ற நிலையில் அந்த படம் முடிவடையும்

இந்நிலையில் ஜீத்துஜோசப் இந்த படத்தை எடுப்பதற்கு ஒருசில வருடங்களுக்கு முன்பே இதேபோன்று ஒருவர் கொலை செய்து கட்டிடத்தின் அடியில் புதைத்துள்ள விவரம் தற்போது தெரியவந்துள்ளது.

கோட்டயம் மாவட்டத்தை சேர்ந்த வைக்கம் என்ற பகுதியை சேர்ந்த அனிஷ் என்பவர் கள்ளநோட்டு அச்சிட்ட வழக்கில் காவல்துறையினர்களால் கைது செய்யப்பட்டார். அவரிடம் விசாரணை நடந்த போது எட்டு வருடங்களுக்கு முன் தனக்கும் மாத்யூஸ் என்பவருக்கும் இடையே நடந்த தகறாரில் மாத்யூஸை கொலை செய்துவிட்டு தான் கட்டிக்கொண்டிருக்கும் கட்டிடத்தின் அடியில் புதைத்துவிட்டதாக வாக்குமூலம் அளித்தார். இந்த தகவல் போலீஸாருக்கு அதிர்ச்சியை ஏற்படுத்தியுள்ளது. தற்போது அவர் கூறிய கட்டிடத்தில் தோண்டி பிணத்தை கைப்பற்றும் நடவடிக்கையில் போலீசார் ஈடுபட்டுள்ளனர்.

ஏற்கனவே தனது தந்தை மாத்யூஸ் காணாமல் போயுள்ளதாகவும், அவர் கொலை செய்யப்பட்டிருக்க வாய்ப்பு இருப்பதாகவும், அவருடைய மகள் நாய்சி காவல்துறையில் புகார் அளித்துள்ளார் என்பது குறிப்பிடத்தக்கது.