గ్లోబల్ స్టార్ రామ్ చరణ్ ఇప్పుడు ఫుల్ స్వింగ్‌లో వున్న సంగతి తెలిసిందే. ఆర్ఆర్ఆర్‌కు ఆస్కార్ అవార్డ్ రావడంతో పాటు తన భార్య ఉపాసన గర్భందాల్చడంతో జీవితంలో మరుపురాని క్షణాలను ఎంజాయ్ చేస్తున్నారు. అటు శంకర్‌తో మూవీని కూడా స్పీడుగా లాగించేస్తున్నాడు. ఇదిలావుండగా .. బాలీవుడ్‌ నుంచి కూడా చరణ్‌కు ఆఫర్లు వస్తున్నాయి. అయితే చెర్రీ ఆచితూచి స్పందిస్తున్నారు. బాలీవుడ్‌లో తొలి నుంచి మెగా ఫ్యామిలీకి మంచి పలుకుబడి వున్న సంగతి తెలిసిందే. దీనిని అవసరానికి అనుగుణంగా వాడుతున్నాడు చెర్రీ.

లుంగీ కట్టి మాస్ లుక్‌లో ఇరగదీసిన గ్లోబల్ స్టార్ :

తాజాగా సల్మాన్ ఖాన్‌ నటిస్తున్న ‘‘కిసీ కా భాయ్ కిసీ కీ జాన్’’ చిత్రంలో చరణ్ సెంటరాఫ్ అట్రాక్షన్‌గా నిలిచారు. తెలుగు అగ్ర కథానాయకుడు విక్టరీ వెంకటేశ్ సైతం కీలక పాత్ర పోషిస్తున్న ఈ సినిమాలో పూజా హెగ్డే హీరోయిన్‌గా నటించింది. ఎన్నో అంచనాల మధ్య రిలీజ్ అవుతున్న ఈ సినిమాలో సల్మాన్, వెంకటేష్‌లతో కలిసి చరణ్ వేసిన స్టెప్పులు ఆకట్టుకుంటున్నాయి. ‘‘ఏంటమ్మా’’ అంటూ సాగే పాటలో లుంగీ కట్టి మాస్ లుక్‌లో ఇరగదీశాడు మన గ్లోబల్ స్టార్.

మంకుపట్టు పట్టిన చరణ్ :

కాగా.. ఈ పాటలో చరణ్‌కు ఛాన్స్ ఎలా వచ్చిందన్న దానిపై సోషల్ మీడియాలో రకరకాల కథనాలు వస్తున్నాయి. దీనిని ఒకసారి చూస్తే.. చిరంజీవి నటించిన ఆచార్య కోసం ధర్మస్థలి సెట్ వేసిన సంగతి తెలిసిందే. ఇక్కడే ‘ఏంటమ్మా’ సాంగ్ చిత్రీకరణ జరిగింది. ఓ రోజు షూటింగ్ చూడటానికి వచ్చిన చరణ్‌కు .. సల్మాన్, వెంకీలతో కలిసి స్క్రీన్ షేర్ చేసుకోవాలని అనిపించిందట. ఇదే విషయాన్ని సల్మాన్‌కు చెప్పగా.. ఆయన తొలుత ఒప్పుకోలేదట. అయినా చెర్రీ వెనక్కి తగ్గకపోవడంతో సల్మాన్ ఒప్పుకోక తప్పలేదట. ఈ క్రమంలోనే జానీ మాస్టర్ కొరియోగ్రఫీలో ముగ్గురు సూపర్‌స్టార్స్ డ్యాన్స్ చేశారు. వీరికి తోడు పూజా హెగ్డే కూడా తన అందచందాలతో ఆకట్టుకుంది. ఏప్రిల్ 21న ‘‘కిసీ కా భాయ్ కిసీ కీ జాన్’’ రిలీజ్ కానుంది. ఈ వీడియో సోషల్ మీడియాలో వైరల్ అవుతోంది.