நடிகர் விஜய்க்கு நெருக்கமானவரும் சூப்பர் குட் பிலிம்ஸ் நிறுவனத்தின் ஆஸ்தான புகைப்படக் கலைஞருமான ஸ்டில் கேமராமேன் சிவா என்பவர் நேற்று தேனி அருகே விபத்து ஒன்றில் மரணம் அடைந்தார். அவருக்கு கோலிவுட் திரையுலகினர் இரங்கல் தெரிவித்து வருகின்றனர்.

தனியார் தொலைக்காட்சி தொடர் ஒன்றில் படப்பிடிப்பிற்காக தேனி சென்ற ஸ்டில் கேமராமேன் சிவா, படப்பிடிப்பு முடிவடைந்த பின்னர் சென்னைக்கு காரில் திரும்பிக் கொண்டிருந்தார். அவருடன் பிரபல குணசித்திர நடிகர் குறும்பன் என்பவரும் பயணம் செய்தார். இவர்கள் பயணம் செய்த கார் தேனி அருகே உள்ள உத்தமபாளையம் என்ற இடத்தில் வந்து கொண்டிருந்தபோது திடீரென விபத்துக்குள்ளானது. இந்த விபத்தில் ஸ்டில்ஸ் சிவா சம்பவ இடத்திலேயே மரணமடைந்தார். நடிகர் குறும்பன் படுகாயமடைந்து உத்தமபாளையம் அரசு மருத்துவமனையில் அனுமதிக்கப்பட்டுள்ளார்.

விஜய் மட்டுமின்றி கோலிவுட் திரைதுறையில் முன்னணி நட்சத்திரங்கள் அனைவருடனும் பணிபுரிந்த ஸ்டில்ஸ் சிவாவின் மறைவு கோலிவுட் திரையுலகினரை அதிர்ச்சியடைய செய்துள்ளது. இந்த விபத்து குறித்து தேனி போலீசார் வழக்குப்பதிவு செய்து விசாரணை செய்து வருகின்றனர்.