కరోనా మహమ్మారి విస్తరిస్తున్న నేపథ్యంలో దేశ వ్యాప్తంగా లాక్ నడుస్తు్న్న విషయం విదితమే. దీంతో సామాన్యుడు మొదలుకుని సెలబ్రిటీ వరకూ ఇంటికే పరిమితం కావాల్సి వచ్చింది. అయితే.. వలస కార్మికులు, సినిమానే నమ్ముకుని బతుకుతున్న దినసరి కూలీలు తీవ్ర ఇబ్బందులు ఎదుర్కొంటున్నారు. మరీ ముఖ్యంగా సినిమా షూటింగ్స్ లేక టెక్నిషియన్స్ అనగా సాంకేతిక, సాంకేతికేతర విభాగాల్లో పనిచేసే వారు ఇక్కట్లు పడుతున్నారు. ఇలాంటి తరుణంలో పలు స్వచ్ఛంద సంస్థలు ముందుకొచ్చి పెద్ద మనసు చాటుకుంటున్నాయి.

‘మా’.. మంచి మనసు!

ఇలాగే తమ వంతుగా సాయం చేయడానికి తెలుగు ప్రేక్షకుల అభిమానంతో మొదటి స్థానంలో దూసుకుపోతున్న ‘స్టార్ మా’ ముందుకొచ్చింది. లాక్ డౌన్‌తో పనుల్లేక ఆదాయం లేక క్లిష్ట పరిస్థితుల్లో ఉన్నవారిపై దృష్టిసారించి సాంకేతిక, సాంకేతికేతర విభాగాల్లో పనిచేసే 500 మందికి పైగా నిపుణుల సంక్షేమం కోసం రూ. 55 లక్షలు విరాళంగా ఇచ్చి దాతృత్వం చాటుకుంది. ఈ సాయం పొందిన వారిలో ఆర్ట్ అసిస్టెంట్, ప్రొడక్షన్ విభాగంలో పనిచేసేవారు, కళాకారుల సహాయకులు, ఫ్రీలాన్సర్స్, సాంకేతిక నిపుణులు ఉన్నారు. వీరందరికీ ప్రయోజనం చేకూరే విధంగా ఈ ఆర్థిక సాయాన్ని ‘స్టార్ మా’ యాజమాన్యం అందజేసింది. మొత్తం ఇలా 500 మందికి పైగా ఒక్కొక్కరి 10,000 రూపాయిలు అందజేసింది. ఇలా సాయం చేయడం చాలా సంతోషంగా ఉందని.. ‘స్టార్ మా’ తమ కోసం ఇలా సాయం చేసి మంచి మనసు చాటుకుందని వారు చెబుతున్నారు.

‘మా’ సాయం గొప్పదే..!

కాగా.. ఒక్కొక్కరికి పదివేలు.. అలా 500 మందికి పైగా ‘స్టార్ మా’ ఇచ్చిందంటే నిజంగా చాలా గ్రేటే అని చెప్పుకోవాలి. ఎందుకంటే ఇప్పట్లో జీతాలు ఇవ్వడమే కష్టం అనుకుంటుంటే.. మరోవైపు ఉన్న జీతాలు సైతం కట్ చేసి ఇస్తున్న తరుణంలో మా మాత్రం పనిలేకపోయినా.. మంచి రోజులొస్తే తర్వాత చూద్దాం లే అని పెద్ద మనసు చేసుకుని మరీ ఆర్థిక సాయం చేసి ఆదుకోవడం మంచి పరిణామమే అని చెప్పుకోవచ్చు. కష్టకాలంలో తోటి వ్యక్తికి సాయం చేస్తే.. మన దగ్గర ఉన్నంతలో కాస్తో కూస్తో సాయం చేస్తే అవతలి వ్యక్తికి కడుపు నింపినవారమవుతాం. సో.. సాయం చేసి మంచి మనసు చాటుకోండి.