డబుల్ ధమాకా ఇవ్వనున్న స్టార్ హీరో, హీరోయిన్
- IndiaGlitz, [Monday,April 30 2018]
ఈ సమ్మర్‌కి డబుల్ ధమాకా ఇవ్వడానికి ఓ స్టార్ హీరో, ఓ స్టార్ హీరోయిన్ సిద్ధపడుతున్నారు. ఆ వివరాల్లోకి వెళితే.. యూత్ స్టార్ విజయ్ దేవరకొండ, చెన్నై బ్యూటీ సమంత ప్ర‌ధాన పాత్ర‌ల్లో నటించిన చిత్రం 'మహానటి'. అలనాటి మేటి నటి సావిత్రి బయోపిక్‌గా తెరకెక్కిన ఈ చిత్రంలో సమంత జర్నలిస్ట్ పాత్రలో నటిస్తుండగా.. విజయ్ దేవరకొండ ఫొటోగ్రాఫర్‌గా కనిపించనున్నారు.
వీరు సహాయక పాత్రలు పోషించిన ఈ చిత్రం మే 9న ప్రేక్షకుల ముందుకు రానుంది. ఆ సినిమా విడుద‌లైన రెండు వారాల త‌రువాత విజయ్ నటించిన మరో సినిమా 'టాక్సీవాలా' మే 18న ప్రేక్షకుల ముందుకు వస్తోంది. 'అర్జున్ రెడ్డి' తర్వాత విజయ్ హీరోగా వస్తున్న మూవీ కావడంతో 'టాక్సీవాలా' పై ప్రేక్షకుల్లో భారీ అంచనాలే ఉన్నాయి.
మ‌రోవైపు.. విశాల్, సమంత జంటగా నటించిన తమిళ అనువాద చిత్రం 'అభిమన్యుడు' మే 11న థియేటర్‌లలో సందడి చేయడానికి సిద్ధంగా ఉంది. 'రంగస్థలం' లాంటి బ్లాక్ బస్టర్ హిట్ తర్వాత వస్తున్న మూవీ కావడంతో సమంత అభిమానుల్లో ఈ సినిమాపై మంచి ఎక్స్‌పెక్టేష‌న్స్‌ నెలకొన్నాయి. మొత్తానికి రెండు రోజుల వ్యవధిలో సమంత డబుల్ ధమాకా ఇస్తుంటే.. 9 రోజుల గ్యాప్‌లో విజయ్ కూడా తన అభిమానులకు డబుల్ ట్రీట్ ఇవ్వబోతున్నారు. మ‌రి వీరిద్దరిలో ఎవరు ప్రేక్షకులని అలరిస్తారో తెలియాలంటే.. కొద్ది రోజులు ఆగాల్సిందే.