మ‌రోసారి తమన్ డబుల్ ధ‌మాకా
- IndiaGlitz, [Monday,March 19 2018]
యువ సంగీత ద‌ర్శ‌కుడు త‌మ‌న్‌కు ఈ ఏడాది బాగానే క‌లిసొస్తోంది. ఒక‌వైపు వ‌రుస విజ‌యాలు అందుకుంటూనే.. మ‌రోవైపు వ‌రుస అవ‌కాశాల‌తో దూసుకుపోతున్నాడు. ఇదిలా ఉంటే.. గ‌త నెల‌లో ఒకే రోజున (ఫిబ్ర‌వ‌రి 9న) గాయ‌త్రి, ఇంటిలిజెంట్ చిత్రాలతో ప‌ల‌క‌రించి డబుల్ ధ‌మాకా ఇచ్చిన తమన్.. వ‌చ్చే నెల‌లో అంటే ఏప్రిల్ 5న కూడా రెండు సినిమాల‌తో డబుల్ ధ‌మాకా ఇచ్చేందుకు సిద్ధ‌మ‌వుతున్నాడు.
కాస్త వివ‌రాల్లోకి వెళితే.. నితిన్ క‌థానాయ‌కుడిగా కృష్ణ చైతన్య ద‌ర్శ‌క‌త్వంలో రూపొందిన ఛ‌ల్ మోహ‌న్ రంగ చిత్రానికి తమన్ సంగీత‌మందించిన సంగ‌తి తెలిసిందే. ఈ సినిమా ఏప్రిల్ 5న విడుదల కానున్న సంగ‌తి తెలిసిందే. అదే రోజున.. మంచు విష్ణు క‌థానాయ‌కుడిగా న‌టించిన ఆచారి అమెరికా యాత్ర కూడా విడుదల కానుంది.
దీనికి కూడా తమన్ సంగీత‌మందించాడు. వాస్త‌వానికి ఈ సినిమా జ‌న‌వ‌రి 26న రిలీజ్ కావాల్సింది. అయితే.. కొన్ని కార‌ణాల వ‌ల్ల వాయిదా ప‌డింది. ఎట్ట‌కేల‌కు ఈ సినిమా ఏప్రిల్ 5న రాబోతోంది. మ‌రి.. ఒకే రోజున రెండు సినిమాల‌తో రాబోతున్న తమన్.. గ‌తంలోలా కాకుండా ఈ రెండు సినిమాల‌తో విజ‌యాలందుకుని వార్త‌ల్లో నిలుస్తాడేమో చూడాలి.