స్వాతంత్ర్యోద్యమం నేపథ్యంలో రాజమౌళి మల్టీస్టారర్ మూవీ?
- IndiaGlitz, [Sunday,April 08 2018]
'బాహుబలి' సిరీస్‌తో తన దర్శకత్వప్రతిభతో ప్రపంచవ్యాప్తంగా అభిమానులను అబ్బురపరిచారు దర్శకధీరుడు ఎస్.ఎస్.రాజమౌళి. ఆయన నుంచి వచ్చే తదుపరి చిత్రం ఎలా ఉంటుందోనని అంతా ఆసక్తిగా ఎదురుచూశారు. వారి ఆసక్తికి తగ్గట్టుగానే ఎన్టీఆర్, రామ్ చరణ్‌లతో మల్టీస్టారర్ మూవీ చేస్తున్నట్టు ప్రకటించి.. ఈ మూవీపై అంచనాలను పెంచుతున్నారు. వారి అంచనాలకు తగ్గట్టుగానే రాజమౌళి కథను రూపొందిస్తున్నారని విశ్వసనీయ వర్గాల సమాచారం.
అంతేకాకుండా.. స్వాతంత్ర్యోద్యమం నేపథ్యంలో సాగే యాక్షన్ థ్రిల్లర్‌గా ఈ చిత్రం ఉండబోతోందని తెలుస్తోంది. అలాగే.. గతాన్ని, ప్రస్తుతాన్ని మిళితం చేసి చిత్రంలో చూపించబోతున్నారట దర్శకుడు. ఫ్లాష్ బ్యాక్‌లో వచ్చే స్వాతంత్ర్యోద్యమం ఘట్టానికి సంబంధించి ఆంగ్ల నటీనటులను కూడా సంప్రదిస్తున్నారని వార్తలు వినిపిస్తున్నాయి.
ఏడాదిన్నరకు పైగా చిత్రీకరణ జరుపుకోబోయే ఈ చిత్రం దాదాపు రూ.250 కోట్ల బడ్జెట్‌తో తెరకెక్కుతోంద‌ని సమాచారం. డి.వి.వి.దానయ్య నిర్మిస్తున్న ఈ సినిమా ఈ ఏడాది అక్టోబర్ నుంచి సెట్స్ పైకి వెళ్లనుంది. కాగా.. సినిమాని 2020 వేసవికి ప్రేక్షకుల ముందుకు తీసుకురావడానికి ప్లాన్ చేస్తున్నార‌ని తెలిసింది.