ఆ పాయింట్ చుట్టూ తిరిగే 'శ్రీనివాస కళ్యాణం'
- IndiaGlitz, [Thursday,May 31 2018]
నితిన్, రాశిఖన్నా జంటగా సతీష్ వేగేశ్న దర్శకత్వంలో తెరకెక్కుతున్న చిత్రం ‘శ్రీనివాస కళ్యాణం’. ప్ర‌ముఖ నిర్మాత ‘దిల్’ రాజు నిర్మిస్తున్న ఈ చిత్రంలో.. పెళ్లి, దాని ప్రాముఖ్యతతో పాటు మానవ సంబంధాలను కూడా తెరపైన చూపించనున్నారని సమాచారం. డబ్బుతో ముడిపడే ఆర్ధిక సంబంధాలకి తప్ప, మానవ సంబంధాలకు అంతగా ప్రాముఖ్యతనివ్వని ఓ వ్యక్తి.. ఓ తెలుగింటి పెళ్ళికి వచ్చి, మానవ సంబంధాలే చాలా గొప్పవని తెలుసుకునేంతగా అతనిని ప్రభావితం చేసిన సంఘటనలు ఏమిటి? అన్నదే సినిమా అని తెలుస్తోంది.
ఈ సినిమా ఫస్ట్ హాఫ్ మొత్తం నార్త్‌లో సాగే సీన్స్‌తో చాలా ఎంటర్‌టైనింగ్‌గా ఉంటుందనీ.. సెకండ్ హాఫ్ అంతా పెళ్లి ఏర్పాట్లు, షాపింగ్‌లు, పెళ్లి పనులతో చాలా హడావుడిగా ఉంటుందని అంటున్నారు. మొత్తానికి ‘దిల్’ రాజు, సతీష్ వేగేశ్న మరోసారి ‘శతమానం భవతి’ లాంటి ఎమోషనల్ మూవీని తెరకెక్కిస్తున్నట్టు తెలుస్తోంది. కాగా.. డబ్బే ముఖ్యమనుకునే పాత్రలో ప్రకాష్ రాజ్ కనిపిస్తున్నట్టు సమాచారం. మిక్కీ జె. మేయర్ సంగీతం అందిస్తున్న ఈ కుటుంబ కథా చిత్రం ఆగష్టు 9న విడుదల కానుంది.