ரஜினிக்கு விசா மறுப்பா? இலங்கை அரசு விளக்கம்
- IndiaGlitz, [Thursday,January 16 2020]
நடிகர் ரஜினிக்கு விசா மறுக்கப்பட்டதாக வெளியான தகவலுக்கு இலங்கை அரசு தற்போது விளக்கம் அளித்துள்ளது.
சமீபத்தில் இலங்கையின் வடக்கு மாகாண முன்னாள் முதல்வர் விக்னேஸ்வரன் சென்னைக்கு வருகை தந்திருந்தபோது, நடிகர் ரஜினிகாந்த் அவர்களை அவரது இல்லத்தில் சந்தித்தார். இந்த சந்திப்பின்போது ரஜினியை அவர் இலங்கையின் யாழ்ப்பாணம் பகுதிக்கு வருகை தரும்படி அழைத்ததாக தகவல்கள் வெளிவந்தது.
இதனையடுத்து ரஜினி இலங்கைக்கு செல்ல முடிவெடுத்து விசாவுக்காக விண்ணப்பம் செய்ததாகவும், ஆனால் இலங்கை அரசு விசா தர மறுத்துவிட்டதாகவும் கூறப்பட்டது. தற்போது இந்த தகவலுக்கு இலங்கை அரசு விளக்கம் அளித்துள்ளது.
விசா கோரி ரஜினியிடம் இருந்து எந்த கோரிக்கையும் வரவில்லை என்றும் நடிகர் ரஜினிக்கு விசா மறுக்கப்பட்டதாக வெளியான தகவலில் உண்மை இல்லை என்றும் இலங்கை அரசு தெரிவித்துள்ளது. இதனையடுத்து ரஜினிக்கு விசா தர இலங்கை அரசு மறுப்பு தெரிவித்ததாக வெளிவந்த தகவல் வதந்தி என்பது தெரிய வருகிறது.