Srikanth Addala:మాస్ కథతో శ్రీకాంత్ అడ్డాల .. పేరు ‘‘పెద్ద కాపు’’, రక్తం మరకలతో ఆ చేతుల వెనుక కథేంటీ..?
- IndiaGlitz, [Tuesday,May 30 2023]
తెలుగు సంస్కృతి, సాంప్రదాయాలు, ఉమ్మడి కుటుంబంలోని అనుబంధాలు వంటి అంశాల చుట్టూ సినిమాలు తీయడంలో మంచి పేరు తెచ్చుకున్నారు దర్శకుడు శ్రీకాంత్ అడ్డాల. ఆయన తీసిన కొత్త బంగారు లోకం, ముకుంద, సీతమ్మ వాకిట్లో సిరిమల్లే చెట్టు, బ్రహ్మోత్సవం, నారప్ప వంటి చిత్రాలతో విభిన్న చిత్రాల దర్శకుడిగా ఆయన గుర్తింపు సొంతం చేసుకున్నారు. విక్టరీ వెంకటేశ్‌తో చేసిన నారప్ప తర్వాత మరో సినిమా అనౌన్స్ చేయడానికి శ్రీకాంత్ కాస్తంత టైమ్ తీసుకున్నారు. ఈసారి సాలిడ్ హిట్‌తో తన సత్తా ఏంటో చూపించాలని ఆయన ప్రయత్నిస్తున్నారు. ఈ క్రమంలోనే మరోసారి మాస్ కథతో వస్తున్నారు శ్రీకాంత్.
అఖండ తర్వాత మిర్యాల రవీందర్ రెడ్డి సినిమా :
బోయపాటి శ్రీనుతో జయ జానకీ నాయక, అఖండ వంటి బ్లాక్ బస్టర్ చిత్రాలను రూపొందించిన మిర్యాల రవీందర్ రెడ్డి నిర్మాణంలో శ్రీకాంత్ ఈ సినిమా చేస్తున్నారు. ఈ కాంబో నుంచి ఇంట్రెస్టింగ్ అప్‌డేట్ వచ్చింది. జూన్ 2న టైటిల్ , ఫస్ట్ లుక్ రిలీజ్ డేట్ అనౌన్స్ చేశారు. తాజా పోస్టర్‌లో రక్తం మరకలతో వున్న చేతిని చూడొచ్చు. దీంతో సినిమాపై భారీ అంచనాలు నెలకొన్నాయి. ఇప్పటికే అఖండ ద్వారా ద్వారకా క్రియేషన్స్ భారీ హిట్‌ను తన ఖాతాలో వేసుకున్న నేపథ్యంలో తాజా చిత్రంపైనా భారీ అంచనాలు అంచనాలు వున్నాయి. దీనికి ‘‘పెద్ద కాపు’’ అనే టైటిల్‌ను దాదాపుగా ఖరారు చేసినట్లుగా వార్తలు వస్తున్నాయి. మిర్యాల రవీందర్ రెడ్డి బావమరిది హీరోగా నటించనున్న ఈ సినిమాను రెండు భాగాలుగా ప్రేక్షకుల ముందుకు తీసుకురావాలని చిత్ర యూనిట్ భావిస్తోంది.
కోనసీమ బ్యాక‌డ్రాప్‌లో స్టోరీ :
1980వ దశకంలో కోనసీమ ప్రాంతంలో జరిగిన కొన్ని ఘటనల ఆధారంగా పెద్ద కాపును తెరకెక్కిస్తున్నట్లుగా ఫిలింనగర్ టాక్. ఆ సమయంలో అక్కడ ముఠా కక్షలు, వర్గపోరు, కులాల కుమ్ములాట వంటివి ఎక్కువగా చోటు చేసుకున్నాయని చెబుతారు. దీనికి పొలిటికల్ టచ్ ఇచ్చేలా శ్రీకాంత్ అద్భుతమైన స్క్రిప్ట్ రెడీ చేస్తున్నట్లుగా తెలుస్తోంది. మరి ఆయన వెండితెరపై ఎలాంటి మ్యాజిక్ చేస్తారో వేచి చూడాల్సిందే.