இளையதளபதி விஜய் நடித்த 'புலி' திரைப்படத்தில் விஜய்க்கு இணையாக பேசப்பட்டு வருபவர் நடிகை ஸ்ரீதேவி. இந்த படத்தின் ரிலீஸை ஸ்ரீதேவி மிகவும் எதிர்பார்த்து காத்திருக்கும் நிலையில், ஸ்ரீதேவியின் மூத்த மகள் ஜான்விகபூர், மலையாள நடிகர் துல்கார் சல்மானுக்கு ஜோடியாக நடிக்கவுள்ளதாக செய்திகள் வெளிவந்தன.

இதுகுறித்து ஸ்ரீதேவி தற்போது விளக்கம் அளித்துள்ளார். 'ஜான்வி தற்போதுதான் பட்டப்படிப்பை முடித்துள்ளார். அவருடைய கவனம் தற்போது மேல்படிப்பில் மட்டுமே உள்ளது. இதுவரை அவர் எந்த திரைப்படத்திலும் நடிக்க ஒப்பந்தம் செய்யப்படவில்லை. நடிகை ஆவதற்குரிய நேரம் இன்னும் கனியவில்லை என்றுதான் நான் நினைக்கின்றேன். எனவே ஜான்வி குறித்து வெளிவந்த செய்தி அனைத்தும் உண்மைக்கு புறம்பானவை' என்று கூறியுள்ளார்.

பாகுபலி' படத்தின் கதாசிரியர் கே.வி.விஜயேந்திர பிரசாத் இயக்கும் படம் ஒன்றில்தான் ஜான்வி நடிக்கவுள்ளதாக செய்திகள் வெளிவந்தன. தற்போது ஸ்ரீதேவியின் விளக்கத்தை அடுத்து அது வதந்தி என்பது உறுதியாகியுள்ளது.