எல்லாமே சாத்தியம் தான்: பெருமை சேர்த்த விமான நிறுவனத்திற்கு நன்றி தெரிவித்த சோனு சூட்!
- IndiaGlitz, [Sunday,March 21 2021]
தனக்கு பெருமை சேர்த்த ஸ்பைஸ்ஜெட் நிறுவனத்திற்கு நன்றி தெரிவித்த நடிகர் சோனுசூட் உங்கள் பெற்றோர்களின் பிரார்த்தனை உங்களுக்கு இருந்தால் எல்லாமே சாத்தியம்தான் என்று கூறியுள்ளார்
கொரோனா பரவிய காலத்தில் பொதுமக்கள் பலர் பல்வேறு இடங்களில் சிக்கிக்கொண்ட நிலையில் புலம்பெயர் தொழிலாளர்கள் பலரை அவரவர் சொந்த இடங்களுக்குச் செல்ல தன்னுடைய சொந்த பணத்தை கோடிக்கணக்கில் செலவு செய்தவர் நடிகர் சோனு சூட். வெளி மாநிலங்களில் மட்டுமின்றி வெளிநாடுகளில் உள்ள மாணவ மாணவியர், தொழிலாளர்களையும் அவர் சொந்த ஊருக்கு அழைத்து வந்தார் என்பதும் குறிப்பிடத்தக்கது
இந்த உதவிக்கு பல்வேறு தரப்பினர் அவருக்கு பாராட்டு தெரிவித்தனர் என்பதும், தெலுங்கானா மாநிலத்தில் அவருக்கு கோயில் கட்டி வழிபட்டு வருகின்றனர் என்பதும் குறிப்பிடத்தக்கது. இந்த நிலையில் சோனு சூட் சேவையை பாராட்டும் விதத்தில் ஸ்பைஸ்ஜெட் நிறுவனம் தங்களுடைய 747 விமானத்தில் சோனுசூட்டின் பிரம்மாண்டமான போஸ்டரை ஒட்டி சிறப்பித்துள்ளது. இப்படி ஒரு சிறப்பை பெறும் முதல் இந்திய நடிகர் சோனு சூட் தான் என்பது குறிப்பிடத்தக்கது
இதுகுறித்து சோனுசூட் கூறிய போது ’இது எனக்கு கிடைத்த மிகப்பெரிய பெருமை. எனது பணியில் மற்றவர்களையும் பெருமைப்படுத்துவேன் என நினைக்கிறேன். ஊரடங்கு காலத்தில் பல்வேறு இடங்களில் இருந்து மக்களை பாதுகாப்பாக கொண்டு வருவதில் ஸ்பைஸ்ஜெட் நிறுவனம் எனக்கு மிகுந்த உதவி செய்தது என்று கூறியுள்ளார். மேலும் உங்களுடைய பெற்றோர்களின் பிரார்த்தனை மட்டும் உங்களுடன் இருந்தால் போதும், சாத்தியம் இல்லாதது எதுவுமே இல்லை என்றும் அவர் தெரிவித்துள்ளார்.