గాన గంధర్వుడు ఎస్పీ బాలసుబ్రహ్మణ్యం అంత్యక్రియలు శనివారం సాయంత్రం నిర్వహించనున్నారు. తమిళనాడులోని తిరువళ్లూరు జిల్లాలో రేపు బాలు అంత్యక్రియలను నిర్వహించేందుకు ఏర్పాట్లు చేస్తున్నారు. రెడ్‌హిల్స్‌ సమీపంలోని తామరైపాకంలో శనివారం సాయంత్రం 4 గంటలకు నిర్వహించనున్నారు. ఎంజీఎం నుంచి కోడంబాకంలోని ఎస్పీ చరణ్‌ ఇంటికి బాలు పార్థీవదేహాన్ని తరలించనున్నారు. అభిమానుల సందర్శనార్థం కోడంబాకంలో బాలు పార్థీవదేహాన్ని ఉంచనున్నారు.

కాగా.. గాన గంధర్వుడు లెజెండరీ సింగర్ ఎస్పీ బాల సుబ్రహ్మణ్యం శుక్రవారం మధ్యాహ్నం పరమపదించారు. కోట్లాది హృదయాల్లో చిచ్చు పెట్టే ఈ వార్తను బాలు కుమారుడు ఎస్పీ చరణ్ దు:ఖ భరిత హృదయంతో వెల్లడించారు. మధ్యాహ్నం 1.04 గం.కు స్వర్గస్తులైనట్లు చరణ్ మీడియా ఎదుట ప్రకటించారు. నాన్న గారు కోలుకోవాలని ప్రార్థనలు చేసిన కోట్లాదిమంది అభిమానులకు ధన్యవాదాలు అని చరణ్ తెలిపారు. ఈ వార్తతో దేశం మొత్తం దు:ఖ సాగరంలో మునిగిపోయింది.