சூப்பர் ஸ்டார் ரஜினிகாந்த் நடித்த 'கபாலி' திரைப்படம் இரண்டாவது ஹவுஸ்புல் வாரமாக திரையரங்குகளில் வெற்றிகரமாக ஓடிக்கொண்டிருப்பதால் இந்த படத்தில் பணிபுரிந்த நடிகர், நடிகைகள் முதல் டெக்னிஷியன்கள் வரை மிகுந்த சந்தோஷத்தில் உள்ளனர்.

இந்நிலையில் 'கபாலி' திரைப்படத்தில் சவுண்ட் எஃபெக்ட் மிக அருமையாகவும் உலக தரம் வாய்ந்ததாக இருந்ததாகவும் பல விமர்சனங்களில் சுட்டிக்காட்டப்பட்டிருந்தது. உதயகுமார் என்பவர் 'கபாலி' படத்தில் மிக அருமையாக சவுண்ட் டிசைனராக பணிபுரிந்தார் என்பதும், குறிப்பாக சண்டைக்காட்சியில் மிக நுணுக்கமாக அவருடைய பணி இருந்தது என்றும் விமர்சனம் செய்யப்பட்டது.

இந்நிலையில் தற்போது இதே உதயகுமார், விஜய்சேதுபதியின் 'தர்மதுரை' படத்திற்கு சவுண்ட் எபெக்ட் பணியை செய்து வருகிறார். இந்த தகவலை இயக்குனர் சீனுராமசாமி தன்னுடைய சமூக வலைத்தளத்தில் உறுதி செய்துள்ளார்.

'தர்மதுரை' படத்தின் இறுதிக்கட்ட போஸ்ட் புரடொக்ஷன்ஸ் பணிகள் நடைபெற்று வருவதாகவும் மிக விரைவில் இந்த படம் சென்சாருக்கு செல்லவுள்ளதாகவும் கூறப்படுகிறது. விஜய்சேதுபதி, தமன்னா, ஐஸ்வர்யா ராஜேஷ், ஸ்ருஷ்டி டாங்கே, ராதிகா உள்ளிட்ட பலர் நடித்துள்ள இந்த படத்திற்கு யுவன்ஷங்கர்ராஜா இசையமைத்துள்ளார். சீனுராமசாமி இயக்கியுள்ள இந்தபடத்தை ஆர்.கே.சுரேஷ் தயாரித்துள்ளார்.