சூர்யா நடிப்பில் சுதா கொங்கரா இயக்கத்தின் உருவாக்கிய சூரரைப்போற்று திரைப்படத்தின் டீசர் சமீபத்தில் வெளியாகி மிகப்பெரிய வரவேற்பைப் பெற்றது என்பது தெரிந்ததே.

இந்த நிலையில் இந்த படத்தின் கதை குறித்து ஒரு முக்கிய தகவலை இயக்குனர் சுதா கொங்கரா சமீபத்தில் அளித்த பேட்டி ஒன்றில் கூறியுள்ளார். இந்த படத்தின் கதை பிரபலமான விமான நிறுவனர் ஜி ஆர் கோபிநாத் அவர்களின் வாழ்க்கை வரலாறு என்று அனைத்து ஊடகங்களிலும் செய்திகள் வெளியான நிலையில் இந்த படத்தின் கதை முழுக்க முழுக்க கோபிநாத் அவர்களின் வாழ்க்கை வரலாறு கதை அல்ல என்றும் ஆனால் இந்த படத்தில் நடக்கும் சம்பவங்கள் அவருடைய வாழ்க்கையிலும் நடந்துள்ளது என்றும் தெரிவித்தார்.

ரூ.6000 கையில் வைத்திருந்த ஒரு முன்னாள் ராணுவ வீரர் எப்படி ஒரு ஏர்லைன்ஸ் நிறுவனராக மாறினார் என்பது ஆச்சரியமான ஒரு விஷயம் என்றும், ஜிஆர் கோபிநாத் குறித்து நம்மில் பலருக்கு தெரியாது என்பதால் இந்த படம் தமிழ் சினிமா ரசிகர்களுக்கு புதியதாக இருக்கும் என்றும் இயக்குனர் மேலும் தெரிவித்தார்.

மேலும் இந்த படத்தை சூர்யாவே தயாரிக்க முன்வந்தது ஒரு முக்கிய விஷயம் என்றும், இந்த படத்தின் பட்ஜெட் அதிகமாகும் என்பதால் மற்ற தயாரிப்பாளர்களிடம் இதனை கொடுத்தால் பல கேள்விகள் எழும் என்பதற்காக சூர்யாவை சொந்தமாக தயாரித்ததாகவும் இந்த படத்திற்காக வாடகைக்கு ஒரு விமானத்தை எடுத்ததாகவும் அதன் வாடகை ஒரு நாள் ஒன்றுக்கு 47 லட்சம் என்றும் ஆனால் அதுகுறித்து தயாரிப்பாளர் சூர்யா ஒரு கேள்வியும் கேட்கவில்லை என்றும் இயக்குனர் புகழாரம் சூட்டினார்.