நடிகர் சூர்யா நடிப்பில், இயக்குனர் சுதா கொங்கரா இயக்கத்தில், ஜீவி பிரகாஷ் இசையமைப்பில் உருவாகிய ‘சூரரைப்போற்று’ திரைப்படத்தின் படப்பிடிப்புகள் முடிந்து தற்போது தொழில்நுட்ப பணிகள் நடைபெற்று வருகிறது. இந்த படம் வரும் ஏப்ரல் மாதம் வெளியாகும் என எதிர்பார்க்கப்பட்ட நிலையில் கடந்த சில வாரங்களாகவே இந்த படத்தின் புரமோஷன் நடைபெற்று வருகிறது

சமீபத்தில் வெளியான இந்த படத்தின் டீசருக்கு நல்ல வரவேற்பு கிடைத்ததை அடுத்து தற்போது வரும் 13ஆம் தேதி இந்த படத்தின் இசை வெளியீட்டு விழா நடத்த படக்குழுவினர் திட்டமிட்டுள்ளனர். விமான நிறுவனர் ஜிஆர் கோபிநாத் அவர்களின் வாழ்க்கை வரலாறு திரைப்படம் என்பதால் இந்தப் படத்தின் பல காட்சிகள் விமானத்தில் எடுக்கப்பட்டது என்பதும் அதற்காக ஒரு விமானம் வாடகைக்கு எடுக்கப்பட்டது என்பதும் தெரிந்ததே

இந்த நிலையில் இந்த படத்தின் இசை வெளியீட்டு விழாவையும் விமான நிலையத்தில் நடத்த படக்குழுவினர் திட்டமிட்டுள்ளனர். இதற்காக சென்னை சர்வதேச விமான நிலையத்தில் படக்குழுவினர் சிறப்பு அனுமதி பெற்றுள்ளனர். முதன்முதலாக தமிழ் திரைப்படம் ஒன்றின் இசை வெளியீட்டு விழா சென்னை விமான நிலையத்தில் நடைபெறுகிறது என்பது குறிப்பிடத்தக்கது. இந்த இசை வெளியீட்டு விழாவில் தமிழ் தெலுங்கு பட பிரபலங்கள் பலர் கலந்து கொள்ள உள்ளனர்