కాంగ్రెస్‌ పార్టీ అధినేత్రి సోనియా గాంధీ మరోసారి అనారోగ్యం పాలయ్యారు. ఆదివారం రాత్రి అస్వస్థతకు గురవ్వడంతో హుటాహుటిన ఆమె ఢిల్లీలోని గంగారామ్ ఆస్పత్రికి తరలించారు. ప్రస్తుతం ఆమెకు వైద్యులు అత్యవసర విభాగంలో చికిత్స అదిస్తున్నట్లు తెలుస్తోంది. కాగా.. గత కొన్ని రోజులుగా ఆమె ఉదరకోశ సమస్యలతో బాధపడుతున్నారు. ఇప్పటికే పలుమార్లు అస్వస్థతకు గురైన ఆమె అనారోగ్యం నుంచి కుదుటపడ్డారు. అయితే తాజాగా ఆమెకు ఏమైంది..? ఎందుకు ఆస్పత్రిలో చేరాల్సి వచ్చింది..? అనే విషయాలు ఇటు సోనియా కుటుంబీకులుగానీ.. అటు వైద్యులు కానీ మీడియాకు ఎలాంటి ప్రకటన చేయలేదు.

అయితే.. సోనియాను సాధారణ చెకప్ విషయమై ఆస్పత్రికి తరలించారని పార్టీ శ్రేణులు చెబుతున్నాయి. ఆమె అస్వస్థతకు గురయ్యారని తెలుసుకున్న కాంగ్రెస్ నేతలు పెద్ద ఎత్తున ఆస్పత్రికి చేరుకున్నారు. మరోవైపు కాంగ్రెస్ పార్టీ కార్యకర్తలు.. ‘గెట్ వెల్ సూన్’ మేడమ్ అంటూ ప్రార్థనలు చేస్తున్నారు. కాగా ఈ ఘటనకు సంబంధించి మరింత సమాచారం తెలియాల్సి ఉంది.