కన్న తల్లి ఎదుటే ఘోరం.. బ్రిడ్జ్‌పై దూకేసిన కొడుకు
- IndiaGlitz, [Thursday,April 18 2019]
కారులో కుమారుడితో కలిసి తల్లి ప్రయాణం చేస్తోంది. ఏం జరిగిందో ఏమోగానీ ఇద్దరి మధ్య గొడవ జరిగింది. అయితే ఆ గొడవ కాస్త ముదిరింది. దీంతో తల్లిపై తీవ్ర ఆగ్రహానికి లోనైన కుమారుడు కారులో నుంచి దిగి బ్రిడ్జిపై నుంచి దూకేశాడు. ఈ షాకింగ్ ఘటన చైనాలోని షాంగై బ్రిడ్జ్‌ వద్ద చోటు చేసుకుంది. బుధవారం నాడు ఈ ఘటన జరగ్గా ఆలస్యంగా వెలుగుచూసింది.
తన కళ్ల ఎదుటే కుమారుడు బ్రిడ్జ్‌పై నుంచి దూకేయడంతో ఆ తల్లి కన్నీరుమున్నీరై బ్రిడ్జ్‌పైనే కుప్పకూలిపోయింది!. ఆ తల్లి ఆవేదనకు సంబంధించిన వీడియోలు, చిత్రాలు సోషల్ మీడియాలో వైరల్ అవుతున్నాయి. ఈ వీడియో చూసిన నెటిజన్లు కంటతడిపెడుతున్నారు. క్షణికావేశంలో ఇలాంటి నిర్ణయాలు తీసుకోకుండా ఉండాల్సింది.. ఇద్దరిలో ఎవరో ఒకరు ఘర్షణ పడకుండా కాస్త తగ్గుంటే ఇంత ఘోరం జరిగి ఉండేది కాదని నెటిజన్లు చెబుతున్నారు. సో.. క్షణికావేశంలో.. ముఖ్యంగా గొడవ జరిగిన సమయాల్లో తీసుకునే నిర్ణయాలు సరైనవి కావు.. అందుకే ఒకటికి రెండుసార్లు ఆలోచించి ముందడుగేయాలని నిపుణులు సూచిస్తుంటారు.