ఆ ఎమ్మెల్యే సమ్‌థింగ్ స్పెషల్...
- IndiaGlitz, [Saturday,November 14 2020]
బిహార్‌కు చెందిన సీపీఐ ఎమ్మెల్యే మహబూబ్ ఆలమ్ గురించి ఓ ఆసక్తికర వార్త వైరల్ అవుతోంది. ఒక్కసారి ఎమ్మెల్యేగా ఎన్నికైతేనే తరతరాలకు సరిపడా సంపాదించుకునే ఈ రోజుల్లో ఆయన నాలుగు సార్లు ఎమ్మెల్యేగా ఎన్నికైనా కనీసం సొంత ఇల్లు కూడా ఆయనకు లేకపోవడం విశేషం. కటిహార్ జిల్లా బలరామ్‌పూర్ నియోజకవర్గం నుంచి మహబూబ్ నాల్గవసారి విజయం సాధించారు. నిజమైన ప్రజానేతగా ప్రజల అభినందనలు అందుకుంటున్నారు. ఇటీవల జరిగిన బీహార్ ఎన్నికల్లో అత్యధిక ఓట్ల తేడాతో మహబూబ్ గెలుపొందారు.
మహబూబ్ ప్రత్యేకలు చాలా ఉన్నాయి. ఆయన ఎక్కడికి వెళ్లాలన్నా నడుచుకునే వెళుతుంటారు. కాగా.. బిహార్ ఎన్నికల్లో విజయం సాధించిన వారిలో 81 శాతం మంది కోటీశ్వరులుగా ఉన్నారు. అయితే మహబూబ్ ఆలమ్ తీరు వీరిందరికన్నా భిన్నమైంది. ఆయన కోట్లకు కోట్లు కూడబెట్టుకోలేదు. కానీ కోట్ల రూపాయల విలువైన ప్రజాభిమానాన్ని మాత్రం పుష్కలంగా సంపాదించుకున్నారు. చెప్పాలంటే మహబూబ్ సమ్ థింగ్ స్పెషల్. అందుకే మహబూబ్ ఆలమ్ సోషల్ మీడియాలో చర్చనీయాంశంగా మారారు.
మహబూబ్ ఆలమ్ సీపీఐ టిక్కెట్‌పై అసెంబ్లీ ఎన్నికల్లో బలరామ్‌పూర్ నియోజకవర్గం నుంచి పోటీ చేసి నాలుగవసారి విజయం సాధించారు. పోనీ ఆయనేమీ వంద, రెండు వందల మెజారిటీతో విజయం సాధించలేదు. ఏకంగా 53 వేల ఓట్ల మెజారిటీతో విజయం దక్కించుకున్నారు. 44 ఏళ్ల మహబూబ్ ఆలమ్ 10వ తరగతి మాత్రమే చదివారు. వ్యవసాయం చేస్తూ కుటుంబాన్ని పోషిస్తున్నారు. ఎన్నికల నామినేషన్ సందర్భంగా అఫిడవిట్‌లో తనకు ఆస్తులేమీ లేవని మహబూబ్ ఆలమ్ చెప్పడం విశేషం.