கோலிவுட் திரையுலகில் மிகக்குறுகிய காலத்தில் முன்னணி நடிகர்கள் பட்டியலில் இணைந்து ரசிகர்களின் பேராதரவை பெற்றவர் நடிகர் சிவகார்த்திகேயன். இவரது நடிப்பில் மோகன்ராஜா இயக்கிய 'வேலைக்காரன்' திரைப்படம் சமீபத்தில் வெளியாகி மிகப்பெரிய வெற்றியை பெற்ற நிலையில் இவர் தற்போது பொன்ராம் இயக்கத்தில் ஒரு படத்தில் நடித்து வருகிறார்.

இந்த படத்தின் டைட்டில் இன்று சிவகார்த்திகேயனின் பிறந்த நாளை முன்னிட்டு நள்ளிரவு 12 மணிக்கு அறிவிக்கப்படும் என ஏற்கனவே அறிவிக்கப்பட்டிருந்தது. அதன்படி இந்த படத்தின் டைட்டில் தற்போது 'சீமராஜா' என்று அறிவிக்கப்பட்டுள்ளது. மேலும் டைட்டிலுடன் கூடிய ஃபர்ஸ்ட்லுக் போஸ்டரும் வெளியாகியுள்ளது. குதிரை மேல் கம்பீரமாக சிவகார்த்திகேயன் உட்காரும் வகையில் அமைந்துள்ள இந்த ஃபர்ஸ்ட்லுக் போஸ்டர் ரசிகர்களிடையே பெரும் வரவேற்பை பெற்றுள்ளது

சிவகார்த்திகேயன், சமந்தா, சிம்ரன், நெப்போலியன், சூரி உள்பட பலர் நடித்து வரும் இந்த படத்திற்கு டி.இமான் இசையமைக்கின்றார். 24ஏஎம் ஸ்டுடியோஸ் நிறுவனம் இந்த படத்தை தயாரிக்கின்றது. இந்த படம் வரும் விநாயகர் சதுர்த்தி தினத்தில் வெளியாகும் என்று அறிவிக்கப்பட்டுள்ளது.