நடிகர் சிவகார்த்திகேயன் நடித்துவரும் “டான்” திரைப்படத்தின் படப்பிடிப்பு பழனி சுற்றியுள்ள பகுதிகளில் எடுக்கப்பட்டு வருகிறது. இதையடுத்து நேற்று காலை பழனி திருக்கோயிலுக்குச் சென்று நடிகர் சிவகார்த்திகேயன் முருகனை வழிபட்டுள்ளார். அப்போது ரசிகர்களுடன் எடுத்துக் கொண்ட புகைப்படம் சோஷியல் மீடியாவில் வைரலாகி வருகிறது.

நடிகர் சிவகார்த்திகேயன் நடிப்பில் “அயலான்”, “டாக்டர்” போன்ற திரைப்படங்கள் வெளிவர இருக்கின்றன. இந்நிலையில் இயக்குநர் அட்லியின் உதவி இயக்குநர் சிபி சக்ரவர்த்தி இயக்கும் “டான்” படத்தில் இணைந்துள்ளார். இந்தப் படத்தை லைகா புரொக்ஷன் மற்றும் சிவகார்த்திகேயன் புரொடெக்ஷன் இரண்டும் இணைந்து தயாரித்து வருகின்றனர்.

இந்த படத்தில் நடிகர் எஸ்.ஜெ.சூர்யா, நகைச்சுவை நடிகர் சூரி, ஆர்.ஜே.விஜய், முனிஸ்காந்த், குத்வித் கோமாளி சிவாங்கி ஆகியோர் இணைந்து நடித்துவருகின்றனர். இந்தத் திரைப்படத்தின் படப்பிடிப்பு பழனி ஒட்டியுள்ள சுற்றுப்பகுதிகளில் நடத்தப்பட்டு வருகிறது. இதையடுத்து நடிகர் சிவகார்த்திகேயன் பழனி முருகன் கோவிலுக்குச் சென்று வழிபாடு நடத்தியுள்ளார்.

சமீபத்தில் நடிகர் சிவகார்த்திகேயனுக்கு ஆண் குழந்தை பிறந்தது. அந்தக் குழந்தைக்கு தன்னுடைய தந்தை குகன் தாஸின் பெயரை அவர் வைத்ததும் குறிப்பிடத்தக்கது. தனது குடும்ப உறுப்பினர்களின் பெயரில் நடிகர் சிவகார்த்திகேயன் அர்ச்சனை செய்து வழிபாடு நடத்தியுள்ளார்.