பூஜை, ஆம்பள படங்களை அடுத்து விஷால் தனது 'பாயும் புலி' படத்தை வரும் செப்டம்பர் 4ஆம் தேதி பிரமாண்டமாக ரிலீஸ் செய்கிறார். விஷால், காஜல் அகர்வால், சூரி மற்றும் பலர் நடித்த இந்த படத்தை சுசீந்திரன் இயக்கியுள்ளார். பாண்டியநாடு' வெற்றிப்படத்தை அடுத்து விஷால்-சுசீந்திரன் இணையும் அடுத்த படம் இது என்பதால் இந்த படத்திற்கு பெரும் எதிர்பார்ப்பு இருக்கின்றது.

இந்நிலையில் விஜய்யின் 'புலி' பட ரிலீஸ் தள்ளி வைக்கப்பட்டதால், செப்டம்பர் 17ஆம் தேதியை ஜி.வி.பிரகாஷின் 'த்ரிஷா இல்லைனா நயன்தாரா, சிவகார்த்திகேயனின் 'ரஜினிமுருகன்' ஆகிய படங்கள் ஆக்கிரமித்து கொண்டன என்பதை ஏற்கனவே பார்த்தோம். இந்நிலையில் 'புலி' ரிலீஸாக இருந்த தேதியை கைப்பற்றிய சிவகார்த்திகேயன், தற்போது 'பாயும் புலி' ரிலீசாகும் தேதியில் அதாவது செப்டம்பர் 4ஆம் தேதி 'ரஜினி முருகன்' படத்தின் டிரைலரை வெளியிட முடிவு செய்துள்ளார்.

சிவகார்த்திகேயன், கீர்த்தி சுரேஷ், ராஜ்கிரண், சூரி, சமுத்திரக்கனி, பேராசிரியர் ஞானசம்பந்தம், ரோபோ சங்கர் உள்பட பலர் நடித்துள்ள 'ரஜினிமுருகன்' திரைப்படத்தை 'வருத்தப்படாத வாலிபர் சங்கம்' பட இயக்குனர் பொன்ராம் இயக்கியுள்ளார். டி.இமான் இசையமைத்துள்ள இந்த படத்தை திருப்பதி பிரதர்ஸ் நிறுவனம் தயாரித்துள்ளது. இந்த படத்தை தமிழகம் முழுவதும் வேந்தர் மூவீஸ் நிறுவனம் ரிலீஸ் செய்கிறது. மான்கராத்தே, காக்கி சட்டை படங்களை அடுத்து சிவகார்த்திகேயனுக்கு இந்த படமும் வெற்றிப்படமாக அமையும் என எதிர்பார்க்கப்படுகிறது.