ఫంటాస్టిక్ తార’కు బ్రాండ్ అంబాసిడర్‌గా సితార
- IndiaGlitz, [Thursday,December 24 2020]
సూపర్ స్టార్ మహేష్ బాబు, నమ్రత శిరోద్కర్‌ల ముద్దుల తనయ సితార ఎంత యాక్టివ్‌గా ఉంటుందో ప్రత్యేకంగా చెప్పనక్కర్లేదు. వివిధ సందర్భాల్లో తండ్రితో కలిసి చేసిన వీడియోలు.. ఆమె నృత్యం చేస్తున్నప్పుడు తీసిన వీడియోలు ఎన్నో సోషల్ మీడియాలో కనిపిస్తూ ఉంటాయి. ఓ సినిమా రిలీజ్‌కు ముందు కూడా సితార తన తండ్రిని ఇంటర్వ్యూ చేసి మెస్మరైజ్ చేసింది. ప్రస్తుతం సితార ఓ 3డీ యానిమేషన్ వెబ్ సిరీస్‌కు బ్రాండ్ అంబాసిడర్‌గా మారింది. ఫంటాస్టిక్ తార అనే వెబ్ సిరీస్‌కు సితార బ్రాండ్ అంబాసిడర్‌గా కొనసాగనుంది.
ఈ వెబ్‌సిరీస్‌‌కి సంబంధించిన పోస్టర్‌ను బుధవారం రాత్రి మాదాపూర్‌లోని ఓ హోటల్‌లో నమ్రతా శిరోద్కర్‌, బాలీవుడ్‌ నటి నేహా ధూపియా, తెలంగాణా ఐటీ శాఖ ముఖ్య కార్యదర్శి జయేష్‌ రంజన్‌ తదితరుల సమక్షంలో విడుదల చేశారు. ఈ సందర్భంగా సితార మాట్లాడుతూ.. బ్రాండ్ అంబాసిడర్‌గా మారడం పట్ల చాలా ఆనందంగా ఉందని తెలిపింది. తన స్నేహితురాలు తార తనతో పాటుగా ఎదగనుందని చెప్పింది. ఈ సిరీస్‌ మొదటి సీజన్‌ ఏప్రిల్‌లో విడుదల చేయనున్నామని నిర్మాతలు నయన్‌, మనీష్‌, డైరెక్టర్‌ రాజేంద్ర తెలిపారు.