తొలి చిత్ర‌మే సూప‌ర్‌స్టార్ మ‌హేష్ బాబు ప‌క్క‌న హీరోయిన్‌గా న‌టించే అవ‌కాశం పొందింది కృతి స‌న‌న్‌. మోడ‌లింగ్ నుంచి సినిమా ఇండ‌స్ట్రీకి వ‌చ్చిన కృతికి ఆ చిత్రం (1 - నేనొక్క‌డినే) పేరు తీసుకువ‌చ్చినా.. విజ‌యాన్నైతే ఇవ్వ‌లేక‌పోయింది. ఆ త‌రువాత వ‌చ్చిన దోచేయ్ కూడా డిజాస్ట‌ర్ కావ‌డంతో తెలుగు తెర‌పై మ‌ళ్లీ క‌నిపించ‌నేలేదు కృతి. అయితే బాలీవుడ్‌లో మాత్రం ఫ‌లితాల‌తో సంబంధం లేకుండా సినిమాలు చేసుకుపోతోందీ అమ్మ‌డు.

లేటెస్ట్ సమాచారం మేరకు కృతిస‌న‌న్‌కు ఓ భారీ చిత్రంలో అవ‌కాశం ద‌క్కింది. అది కూడా ఓ ప్యాన్ ఇండియా మూవీ. ఇలాంటి సినిమా చేస్తే అటు ద‌క్షిణాది, ఇటు ఉత్త‌రాది ప్రేక్ష‌కుల‌కు ద‌గ్గ‌ర కావ‌డం ఖాయం కావ‌డంతో కృతి కూడా ఆ సినిమాలో చేయ‌డానికి ఓకే చెప్పేసింద‌ని అంటున్నారు. ఆ సినిమా ఏదో కాదు.. ఆదిపురుష్‌.

ప్ర‌భాస్ హీరోగా, ఓంరావుత్ ద‌ర్శ‌క‌త్వంలో ఈ సినిమా తెర‌కెక్క‌నుంది. ఇందులో ప్ర‌భాస్ రాముడిగా న‌టిస్తుంటే, సైఫ్ అలీఖాన్ రావ‌ణాసురుడిగా న‌టిస్తున్నారు. మ‌రి సీత పాత్ర‌లో ఎవ‌రు న‌టిస్తారు? అనే దానిపై చాలా మంది హీరోయిన్స్ పేర్లు సోష‌ల్ మీడియాలో హ‌ల్‌చ‌ల్ చేశాయి.

అయితే ఇప్పుడు కృతిస‌న‌న్ దాదాపు ఖ‌రారైన‌ట్లేన‌ని వార్త‌లు వినిపిస్తున్నాయి. ప్ర‌స్తుతం రాధేశ్యామ్ చిత్రీక‌ర‌ణ‌లో బిజీగా ఉన్న ప్ర‌భాస్ ఈ సినిమానే స్టార్ట్ చేస్తాడ‌ని టాక్ వినిపిస్తోంది.