நடிகர் சிங்கம்புலி தனது பெயரில் மோசடி நடப்பதாகவும் அதை உண்மை என நம்பி ஏமாந்து விட வேண்டாம் என்றும் கேட்டுக் கொண்டு வீடியோ ஒன்றை வெளியிட்டுள்ள நிலையில் அந்த வீடியோ தற்போது இணையத்தில் வைரல் ஆகி வருகிறது.

தமிழ் திரை உலகில் காமெடி நடிகராக இருப்பவர் சிங்கம் புலி என்பதும் இவர் அஜித் நடித்த ’ரெட்’ சூர்யா நடித்த ’மாயாவி’ ஆகிய படங்களை இயக்கியுள்ளார் என்பது குறிப்பிடத்தக்கது. தற்போது காமெடி நடிகராக தமிழ் திரை உலகில் கலக்கிக் கொண்டிருக்கும் இவர் சமீபத்தில் வெளியான ’அரண்மனை 4’படத்தில் கூட ஒரு கேரக்டரில் நடித்துள்ளார்.

இந்த நிலையில் சிங்கம்புலியின் முகநூல் பக்கம் என்று ஒரு போலியான பக்கம் ஆரம்பிக்கப்பட்டு அதில் அவர் உடல் நலம் இன்றி மருத்துவமனையில் சிகிச்சை பெற்று வருவதாகவும் அவருக்கு தற்போது சிகிச்சைக்கு பணம் தேவைப்படுவதால் உதவி செய்யவும் என்றும் கோரிக்கை விடுத்து ஒரு விளம்பரம் செய்யப்பட்டிருந்தது.

இந்த விளம்பரம் இணையத்தில் வைரலான நிலையில் ஒரு சிலர் பணம் அனுப்பியதாகவும் கூறப்படும் நிலையில் சிங்கம் புலி இது குறித்து ஒரு வீடியோ வெளியிட்டுள்ளார். அந்த வீடியோவில் ’தனது பெயரில் போலியான முகநூல் பக்கம் ஆரம்பித்து ஒரு சிலர் தனக்கு உடல்நலம் இல்லை என பணம் வசூல் செய்வது குறித்து கேள்விப்பட்டேன். எனக்கு உடல்நலம் இல்லை என்பது முழுக்க முழுக்க பொய், நான் நன்றாக தான் இருக்கிறேன், நான் யாரிடமும் பணம் கேட்கவில்லை, எனவே இது போன்ற போலியான விளம்பரங்களை நம்பி யாரும் பணம் கொடுத்து ஏமாந்து விட வேண்டாம்’ என்றும் தெரிவித்துள்ளார். இந்த வீடியோ தற்போது இணையத்தில் வைரல் ஆகி வருகிறது.