திரைத்துறையில் காலடி எடுத்து வைக்கும் சிம்ரனின் கணவர்
- IndiaGlitz, [Tuesday,October 27 2015]
கடந்த 1997ஆம் வருடம் சிவாஜி கணேசன், விஜய் நடித்த ஒன்ஸ்மோர் படத்தின் மூலம் கோலிவுட் திரையுலகிற்கு அறிமுகமான சிம்ரன் அதன் பின்னர் கமல்ஹாசன், விஜய், அஜீத், விஜயகாந்த், சரத்குமார், பிரசாந்த் உள்பட முன்னணி நடிகர்களின் படங்களில் நடித்து பல சூப்பர் ஹிட் படங்களை கொடுத்தார்.
இந்நிலையில் கடந்த 2003ஆம் ஆண்டு தனது நீண்ட நாள் நண்பரான தீபக் பாகா என்பவரை திருமணம் செய்துகொண்டு திரையுலகில் இருந்து சிறிது காலம் விலகி இருந்தார். தற்போது 'த்ரிஷா இல்லைனா நயன்தாரா' உள்பட ஒருசில படங்களில் அவர் மீண்டும் நடித்து வருகிறார்.
இந்நிலையில் தொலைக்காட்சி தொடர்களை தயாரித்து வரும் சிம்ரனின் கணவர் தீபக் பாகா, தற்போது 'சிம்ரன் அண்ட் சன்ஸ்' என்ற திரைப்பட கம்பெனி ஒன்றை ஆரம்பித்துள்ளதாகவும், இதன் மூலம் திரைப்படங்களை தயாரிக்க அவர் முடிவு செய்துள்ளதாகவும் கூறப்படுகிறது.
'சிம்ரன் அண்ட் சன்ஸ்' தயாரிக்கும் முதல் படத்தை கெளரி சங்கர் என்பவர் இயக்கவுள்ளார். இவர் பல விளம்பர படங்களை இயக்கிய அனுபவம் உள்ளவர் என்பது குறிப்பிடத்தக்கது. இந்த படத்தில் சிம்ரன் முக்கிய வேடத்தில் நடிக்கவுள்ளதாகவும், இந்த படத்தின் டைட்டில் மற்றும் நடிகர்கள், தொழில்நுட்ப கலைஞர்கள் தேர்வு செய்யப்பட்டு வருவதாகவும், விரைவில் இந்த படம் குறித்த அதிகாரபூர்வ அறிவிப்பு வெளிவரும் என்று கூறப்படுகிறது.