தமிழ் திரையுலகில் ஒருவர் பல துறைகளிலும் வெற்றி காண்பது என்பது அபூர்வமாகவே நடந்து வரும் நிகழ்வு. அந்த வகையில் அஷ்டவதானி என்று தமிழ் திரையுலகினர்களால் அழைக்கப்படும் டி.ராஜேந்தரின் கலையுலக வாரிசு சிம்புவும் பல துறைகளில் ஈடுபட்டு அதில் வெற்றி காண்பது என்பது ஆச்சரியம் அளிக்கும் செய்தி அல்ல

நடிகர், இயக்குனர், பாடலாசிரியர், இசையமப்பாளர், பாடகர், என பல அவதாரங்களில் ஜொலித்து வரும் சிம்பு, தற்போது பாடகர் அவதாரத்தில் புதிய மைல்கல்லை எட்டியுள்ளார். ஆம், அவர் சமீபத்தில் பாடிய ஒரு பாடல் அவர் பாடிய 100வது பாடல் என்ற பெருமையை பெற்றுள்ளது.

கவுதம் மேனன் தயாரிப்பில் ஜெகன்நாத் இயக்கி வரும் 'என் ஆளோட செருப்பை காணோம்' என்ற படத்திற்காக சிம்பு பாடிய 'என் ஆளோட செருப்ப காணோம்' என்ற பாடல்தான் சிம்புவின் 100வது பாடல் என்பது குறிப்பிடத்தக்கது. இந்த பாடல் தற்போது யூடியூபில் வெளியாகி வைரலாகி வருகிறது. 

தனது 100வது பாடல் குறித்து சிம்பு கூறியதாவது: பாடல்களை பாட வேண்டும் என்பது என்னுடைய தனிப்பட்ட ஆர்வம். இந்த ஆர்வம் என் தந்தையிடம் இருந்து எனக்கு வந்தது. இதுவரை 100 பாடல்களை பாடியுள்ளேன் என்பதை நான் உணரவே இல்லை. எப்போதுமே புதியதாக ஏதாவது கற்றுக்கொள்ள வேண்டும் என்ற ஆர்வமுடைய நான் அனைத்து இசையமைப்பாளர்களுடனும் வேலை செய்திருப்பது ஒரு புரிதலை கொடுத்துள்ளது. என்னை பொருத்தவரையில் 100 என்பது ஒரு நம்பர் தான் என்றாலும் இதை நான் பெருமையாக உணர்கிறேன்' என்று கூறியுள்ளார்.