கட்டப்பா கேரக்டரை கையில் எடுத்த சிபிராஜ்
- IndiaGlitz, [Friday,June 10 2016]
பிரமாண்ட இயக்குனர் எஸ்.எஸ்.ராஜமவுலி இயக்கிய 'பாகுபலி' திரைப்படம் கடந்த ஆண்டு வெளியாகி உலகம் முழுவதும் சூப்பர் ஹிட் வெற்றி பெற்று ரூ.600 கோடிக்கும் மேல் சம்பாதித்தது. முதல் பாகத்தை பார்த்த அனைவரும் கண்டிப்பாக இந்த படத்தின் இரண்டாம் பாகத்தை பார்ப்பார்கள். ஏனெனில் 'பாகுபலியை கட்டப்பா ஏன் கொலை செய்தார்? என்பதை தெரிந்து கொள்ளாமல் யாராலும் இருக்க முடியாது. அந்த அளவுக்கு நடிகர் சத்யராஜ் நடித்த இந்த கட்டப்பா கேரக்டர் அனைவரின் மனதிலும் தங்கிவிட்டது.
இந்நிலையில் உலகம் முழுவதும் புகழ்பெற்ற இந்த கட்டப்பா கேரக்டரை சத்யராஜின் மகன் தற்போது கையில் எடுத்துள்ளார். ஆம் சிபிராஜ் நடிக்கவுள்ள அடுத்த படத்திற்கு 'கட்டப்பாவை காணோம்' என்ற தலைப்பு வைக்கப்பட்டுள்ளதாக செய்திகள் வெளிவந்துள்ளது.
'ஜாக்சன் துரை' படத்தை அடுத்து இயக்குனர் மணி இயக்கத்தில் சிபிராஜ் ஒரு படத்தில் நடிக்கவுள்ளார். இந்த படத்திற்குத்தான் 'கட்டப்பாவை காணோம்' என்ற தலைப்பு வைக்கப்பட்டுள்ளது. கட்டப்பா பெயரை பயன்படுத்தியிருந்தாலும் அந்த கேரக்டரை நாங்கள் எந்த விதத்திலும் மிஸ்யூஸ் பண்ண மாட்டோம் என்று இயக்குனர் உறுதியுள்ளார்.
இந்நிலையில் சிபிராஜின் 'ஜாக்சன் துரை' படத்தின் தெலுங்கு பதிப்பிற்கு 'கட்டப்ப ராஜூ' என்ற டைட்டில் வைக்கப்பட்டுள்ளது என்பதும் இங்கே குறிப்பிடத்தக்கது.