ஸ்ருதிஹாசனின் ஆன்மீக டாட்டூ.. பகுத்தறிவாளர் கமலுக்கு இப்படி ஒரு மகளா?
- IndiaGlitz, [Tuesday,April 25 2023]
உலகநாயகன் கமல்ஹாசன் பகுத்தறிவு கொள்கையை கடைபிடித்து வரும் நிலையில் அவரது மகள் ஸ்ருதிஹாசன் ஆன்மீகத்தில் மிகுந்த ஈடுபாடு கொண்டவராக இருந்து வருகிறார் என்பதை ஏற்கனவே பலமுறை பார்த்தோம். இந்த நிலையில் தற்போது அவர் ஆன்மீகத்தின் அடிப்படையில் தனது உடலில் ஒரு டாட்டுவை வரைந்து உள்ளதை அடுத்து அது குறித்த புகைப்படம் இணையதளங்களில் வைரலாகி வருகிறது.
கமல்ஹாசனின் மகள் ஸ்ருதிஹாசன் சிறுவயதில் இருந்தே ஆன்மீகத்தில் ஆட்டம் கொண்டவர் என்றும் அவ்வப்போது பேட்டிகளில் தனது ஆன்மீக கருத்துக்களை பதிவு செய்து வருவார் என்பதும் குறிப்பிடத்தக்கது. இந்த நிலையில் தற்போது அவர் தனது உடலில் முருகனின் வேல் குறித்த டாட்டுவை பதிவு செய்துள்ளார்.
இது குறித்து அவர் கூறிய போது ’நான் எப்போதுமே ஆன்மீகத்தில் நாட்டம் கொண்டவர், முருகப்பெருமானின் வேலுக்கு என் இதயத்தில் எப்போதுமே ஒரு இடம் உண்டு, இந்த டாட்டு மூலம் எனது பக்தியை வெளிப்படுத்த விரும்புகிறேன்’ என்று தனது இன்ஸ்டாகிராமில் கூறியுள்ளார்.
மேலும் பச்சை குத்துவது என்பது என்னுடைய வழக்கமான ஒன்றாகும், தற்போது ஆன்மீகத்தின் தொடர்புடைய பச்சை குத்த வேண்டும் என்று விரும்பினேன், வேறு எதுவும் குறிப்பிட்ட நிகழ்வு இல்லை என்றும் அவர் தெரிவித்துள்ளார். ஆன்மீகம் என்பது என்னை அடக்கமாகவும் பாதுகாப்பாகவும் வைத்திருக்க உதவுகிறது என்றும் அவர் தெரிவித்துள்ளார்.
கடந்த சில மாதங்களுக்கு முன்னர் வெளியான ’வீரசிம்ஹ ரெட்டி’ மற்றும் ’வால்டர் வீரய்யா’ ஆகிய படங்களில் நடித்த ஸ்ருதிஹாசன் தற்போது பிரபாஸ் நடித்து வரும் ’சலார்’ என்ற படத்திலும் ’தி ஐ’ என்ற ஆங்கில படத்திலும் நடித்து வருகிறார் என்பது குறிப்பிடத்தக்கது.