இசைஞானி இளையராஜா உட்பட பல திரையுலக பிரபலங்களின் பயோபிக் திரைப்படங்கள் உருவாகி வரும் நிலையில் கமல்ஹாசன் பயோபிக் திரைப்படத்தை நான் இயக்க மாட்டேன் என்று கூறிய அவரது மகள் ஸ்ருதிஹாசன் அதற்கான காரணத்தையும் தெரிவித்துள்ளார்.

உலகம் முழுவதும் இன்று தந்தையர் தினம் கொண்டாடப்பட்டு வரும் நிலையில் தந்தையர் தினம் தொடர்பாக நடந்த நிகழ்ச்சியில் கமல்ஹாசனின் மகள் ஸ்ருதிஹாசன் கலந்து கொண்டார். அப்போது அவரிடம் பல்வேறு கேள்விகள் கேட்கப்பட்ட நிலையில் கமல்ஹாசனின் வாழ்க்கை வரலாறு திரைப்படத்தை இயக்கும் வாய்ப்பு கிடைத்தால் நீங்கள் இயக்குவீர்களா என்ற கேள்வி கேட்கப்பட்டது.

அதற்கு ஸ்ருதிஹாசன் ‘கண்டிப்பாக நான் எனது அப்பாவின் வாழ்க்கை வரலாற்றை திரைப்படமாக இயக்க மாட்டேன், நான் அவருடைய வாழ்க்கை வரலாறு திரைப்படமாக எடுத்தால் அது ஒரு தலைப்பட்சமாக இருக்கும், அந்த படத்திற்கு நியாயம் கற்பிக்கும் வகையில் இருக்காது, எனவே அவரது வாழ்க்கையை நியாயம் கற்பிக்கும் வகையில் இயக்குவதற்கு இங்கே நிறைய திறமையான இயக்குனர்கள் உள்ளார்கள், அவர்களில் ஒருவர் அந்த படத்தை எடுக்கட்டும்’ என்று கூறியுள்ளார்.

ஸ்ருதிஹாசன் ஏற்கனவே ஒரு திரைப்படத்தை இயக்க உள்ளதாக கூறப்படும் நிலையில் அந்த படம் அவரது தந்தை கமல்ஹாசனின் வாழ்க்கை வரலாறு படம் இல்லை என்பது தற்போது உறுதி செய்யப்பட்டுள்ளது.